Xitoyning Shanxay shahrida oziq-ovqat yetkazib beruvchi sifatida ishlagan 25 yoshli Chjan Syuyesyan o‘zining hayotiy tajribasi bilan ko‘plab odamlarga ilhom bag‘ishladi. Bu haqda Zamin.uz xabar berdi.
U besh yil davomida qattiq mehnat qilib, 50 ming yuan (taxminan 7 ming dollar) qarzidan qutuldi va yana 1,12 million yuan (160 ming dollar) mablag‘ jamg‘ardi. Bu haqda South China Morning Post nashri xabar berdi.
Chjan 2020-yilda tug‘ilib o‘sgan Chjanchjou shahridagi kichik oshxonasi bankrot bo‘lib, qarzga botganidan keyin Shanxayga ko‘chib o‘tishga majbur bo‘ldi. U yangi shaharda hayotini noldan boshladi va qat’iy ish rejimiga amal qila boshladi.
Chjan har kuni soat 10:40 da ishga chiqib, tungi 01:00 gacha buyurtmalarni yetkazib bergan. U yil davomida ta’tilsiz ishlagan va faqat Xitoy Yangi yili bayramida bir necha kun dam olgan.
Chjanning hisob-kitoblariga ko‘ra, u besh yil davomida 324 ming kilometr masofani bosib o‘tgan. Bu Yer sharini sakkiz martadan ortiq aylanib chiqishga teng masofa.
U o‘z mablag‘ini tejashga katta e’tibor bergan va ortiqcha xarajatlardan tiyilgan. “Men faqat zarur ehtiyojlarim uchun pul sarflayman.
Kuniga o‘rtacha 13 soat ishlayman, qolgan vaqtim ovqat va uyquga ketadi”, deydi Chjan. Shu bilan birga, u sog‘lig‘iga ham e’tibor qaratgan.
Kuniga 8,5 soat uxlash va qat’iy tartibga rioya qilish unga uzoq muddat davomida kuchini saqlash imkonini bergan. Hamkasblari uning mehnatsevarligi va intizomini ta’kidlaydi.
Yetkazib berish markazi rahbari Chjanning doimiy harakatda bo‘lishini va ishga butunlay berilganini qayd etadi. Internet foydalanuvchilari va hamkasblari Chjanni “Buyurtmalar qiroli” deb atashgan.
U esa bu yutuqni oddiy qabul qiladi: “Barcha qarzlarimdan qutuldim va mehnatim evaziga mablag‘ to‘pladim. Bu men uchun katta muvaffaqiyat”, deydi u.
Chjan to‘plagan mablag‘ini kelajakdagi tadbirkorlik loyihalariga sarflashni rejalashtirmoqda. U Shanxayda nonushtalarga ixtisoslashgan ikkita kichik kafe ochishni mo‘ljallamoqda va bu uchun 800 ming yuan (113 ming dollar) sarmoya kiritishni rejalashtirgan.
Besh yillik mashaqqatli mehnat Chjanga nafaqat moliyaviy erkinlikni, balki yangi imkoniyatlarni ham taqdim etdi. Uning hikoyasi sabr, intizom va mehnat orqali qiyin vaziyatlarni yengib o‘tish mumkinligini isbotlaydi.
