Italiya dunyoning eng mazali oshxonasi deb topildi
Dunyodagi eng mashhur milliy oshxonalar reytingi e’lon qilindi. Bu haqda Zamin.uz xabar berdi.
Xalqaro gastronomik platforma tomonidan qariyb 19 mingta an’anaviy taom tahlil qilinib, dunyoning eng yaxshi 100 mamlakati oshxonalari saralandi. Mazkur reyting foydalanuvchilar tomonidan qoldirilgan haqiqiy baholar asosida shakllantirilgan.
Tashkilot ma’lumotiga ko‘ra, ovoz berish jarayonida sun’iy ta’sirlar yoki botlar ishtiroki hisobga olinmagan. Natijalarga ko‘ra, Italiya dunyoning eng mazali milliy oshxonasi sifatida birinchi o‘rinni egalladi.
Ikkinchi o‘rinda Gretsiya, uchinchi o‘rinda esa Peru joylashdi. Kuchli o‘nlikka shuningdek, Portugaliya, Ispaniya, Yaponiya, Turkiya, Xitoy, Fransiya va Indoneziya kabi mamlakatlar kiritildi.
Markaziy Osiyo davlatlaridan faqat Qozog‘iston ushbu ro‘yxatga kirib, 98-o‘rinni egalladi. Garchi umumiy natija yuqori bo‘lmasa-da, ayrim milliy taomlar foydalanuvchilar tomonidan ijobiy baholangan.
Jumladan, mintaqaga xos bo‘lgan somsa alohida e’tirof etildi. Go‘shtli, qarsildoq va xushbo‘y bu taom “mintaqaning klassik va sevimli taomlaridan biri” deb ta’riflangan.
Shu tariqa, dunyo oshxonalari baholanar ekan, somsa ham o‘ziga xos o‘ringa ega bo‘ldi.
