Dunyoning eng yaxshi milliy oshxonalari reytingi e’lon qilindi. Bu haqda Zamin.uz xabar berdi.
TasteAtlas gastronomik platformasi tomonidan taqdim etilgan ma’lumotlarga ko‘ra, dunyo bo‘ylab qariyb 19 mingta an’anaviy taom tahlil qilinib, eng mazali deb topilgan 100 ta milliy oshxona ro‘yxati shakllantirilgan. Reyting tasdiqlangan 590 mingdan ortiq baholarga asoslangan bo‘lib, har bir mamlakatning o‘rni foydalanuvchilar tomonidan qo‘yilgan o‘rtacha ballar asosida aniqlangan.
Shuningdek, reytingni tuzishda faqat haqiqiy foydalanuvchilarning baholari inobatga olingani va sun’iy oshirishlarning oldini olish uchun maxsus mexanizmlar qo‘llangani ta’kidlangan. TasteAtlas talqiniga ko‘ra, dunyodagi eng mazali milliy oshxonalar ro‘yxatida Italiya birinchi o‘rinni egallab, 4,64 ball bilan yetakchilik qilmoqda.
Keyingi o‘rinlarda Gretsiya (4,60), Peru (4,54), Portugaliya (4,53), Ispaniya (4,53), Yaponiya (4,49), Turkiya (4,49), Xitoy (4,48), Fransiya (4,48) va Indoneziya (4,48) kabi davlatlar joy olgan. Markaziy Osiyo mamlakatlari ichida faqat Qozog‘iston ushbu ro‘yxatga kirgan.
Qozog‘iston 98-o‘rinni egallab, o‘rtacha 3,9 ball bilan baholangan. Garchi umumiy reytingda past o‘rin qayd etilgan bo‘lsa-da, mamlakatning ayrim milliy taomlari yuqori baholanib, alohida tavsiya etilgan.
Jumladan, Markaziy Osiyo bo‘ylab mashhur bo‘lgan somsa 4,0 ball bilan baholanib, “qarsildoq xamirli, xushbo‘y hidli va mintaqaning klassik taomi” sifatida tavsiflangan.
