Putin va Durov uchrashuvi: Telegramga ta’siri qanday?

Rossiya prezidenti Vladimir Putin va mashhur tadbirkor Pavel Durov o‘rtasida 2013 yilda bo‘lib o‘tgan maxfiy uchrashuv tafsilotlari yaqinda ommaga oshkor bo‘ldi. Bu haqda Zamin.uz xabar berdi.

Jurnalist Nikolay Kononovning «Kod Durova 2» kitobida yozilishicha, Putin o‘sha paytda «VKontakte» ijtimoiy tarmog‘ining asoschisi bo‘lgan Durovga Rossiyadan ketishni maslahat bergan. 2013 yilda Kremlda yirik tadbirkorlar ishtirokida o‘tkazilgan qabul chog‘ida Durov prezident bilan tanishtiriladi.

Biroq suhbat Durov kutganidek samimiy kechmaydi. Putin ijtimoiy tarmoqdagi noqonuniy kontent va pornografiya haqida gapirib, bunday faoliyat Rossiyaga mos emasligini ta’kidlaydi.

U hatto Durovga biznesini Isroilda yuritishni tavsiya qiladi. Mazkur uchrashuv Durov hayotida muhim burilish bo‘ldi.

U o‘z loyihalarini sotish va mamlakatni tark etish zarurligini tushunadi. 2014 yilda Durov «VKontakte»dagi ulushini sotib, Rossiyani tark etadi va Telegram loyihasiga to‘liq e’tibor qaratadi.

Durovning aytishicha, u 2014 yildan buyon Rossiyaga qaytmagan. Biroq ayrim jurnalistik surishtiruvlarga ko‘ra, Durov 2014 yildan keyin kamida 50 marta Rossiyaga tashrif buyurgan.

Vladimir Putin esa ushbu uchrashuvni eslab, Durov bilan faqat bir marta ko‘rishganini aytadi va bu uchrashuvni oddiy ish uchrashuvlaridan biri sifatida baholaydi. Bugungi kunda Telegram dunyoning eng ommabop messenjerlaridan biriga aylangan.

Ammo o‘sha sirli uchrashuv Telegramning shakllanishida qanday rol o‘ynagani hamon qiziq savol bo‘lib qolmoqda. Agar Durov Rossiyada qolganida, Telegram hozirgidek muvaffaqiyatga erisha olarmidi?