Katolik cherkovi rahbari, Rim papasi Lev XIV, Rojdestvo bayrami munosabati bilan butun dunyoda kamida bir kunlik tinchlik o‘rnatishga chaqirdi. Bu haqda Zamin.uz xabar berdi.
U bayram kunlari urushlardan tiyilish insoniylik va o‘zaro hurmatning muhim belgisi ekanini ta’kidladi. 23-dekabr kuni kechqurun Rim yaqinidagi Kastel-Gandolfo qarorgohida jurnalistlar bilan suhbatda papa barcha ezgu niyatli insonlarga murojaat qildi.
U: “Kamida bir kun, hech bo‘lmasa bayram munosabati bilan tinchlikka hurmat bilan yondashishga chorlayman”, dedi. Lev XIVni eng ko‘p tashvishga solayotgan masalalardan biri Rossiyaning o‘t ochishni to‘xtatish bo‘yicha chaqiriqlarni rad etishi ekanini ochiq aytdi.
Uning fikricha, Rojdestvo kabi muqaddas kunlarda qurollarning sukut saqlashi dunyodagi og‘riq va azoblarni yengillashtirishi mumkin. Ma’lumki, Rossiya 2022-yil fevral oyida Ukrainaga qarshi harbiy harakatlarni boshlaganidan buyon o‘t ochishni to‘xtatish bo‘yicha bir necha taklifni qabul qilmagan.
Shu bilan birga, AQSHning Florida shtatida o‘tkazilgan tinchlik muzokaralari ham hozircha sezilarli natija bermadi. Ukraina tomoni esa Donesk viloyatidagi Seversk shahridan og‘ir janglardan so‘ng chekinishini ma’lum qildi.
Rim papasi o‘z chiqishida: “Men baribir quloq solishlariga va butun dunyoda kamida 24 soat tinchlik bo‘lishiga umid qilaman”, deya o‘z optimizmini bildirdi. Shuningdek, u dekabr oyida Italiyada Ukraina prezidenti Volodimir Zelenskiyni qabul qilganini eslatdi.
Zelenskiyning Ukrainani ziyorat qilish taklifiga papa ehtiyotkorlik bilan munosabat bildirib, bunday safar qachon amalga oshishi haqida aniq ma’lumot bera olmasligini qo‘shimcha qildi. Papaning ushbu murojaati Rojdestvo bayrami arafasida dunyo jamoatchiligi orasida tinchlikka oid muhokamalarni jonlantirdi.
