Tojikistonda qor qoploni (qor barsi)ni ovlash va unga bog‘liq noqonuniy harakatlar uchun jazo choralari kuchaytirildi. Bu haqda Zamin.uz xabar berdi.
Mamlakat parlamenti Jinoyat kodeksiga tegishli o‘zgartirishlar kiritdi. Bu haqda parlamentning rasmiy nashri "Sadoi mardum" ma’lum qildi.
Yangi tahrirga muvofiq, Jinoyat kodeksining 232-1-moddasi endi “Qor barsini ovlash, qasddan yo‘q qilish, shuningdek, uni noqonuniy olish, saqlash, topshirish yoki sotish” deb nomlanadi. Ilgari ushbu modda faqat ov qilish va qasddan nobud etish holatlarini qamrab olgan edi.
Endilikda bu turdagi qonunbuzarliklar uchun 1200–1800 hisoblash ko‘rsatkichi (117–175 million so‘m) miqdorida jarima yoki 3 yilgacha ozodlikdan mahrum etish jazosini qo‘llash belgilangan. Ilgari jarima miqdori 800–1200 hisoblash ko‘rsatkichi (78–117 million so‘m) bilan cheklangan edi.
Agar jinoyat takroran sodir etilsa, jazo yanada og‘irlashtiriladi. Bunday holatda 2000–3000 hisoblash ko‘rsatkichi (195–292 million so‘m) miqdorida jarima yoki 4 yildan 8 yilgacha ozodlikdan mahrum etish jazosi qo‘llanadi.
Bundan tashqari, aybdorlar 5 yilgacha muayyan lavozimlarda ishlash yoki ayrim faoliyat turlari bilan shug‘ullanish huquqidan mahrum qilinishi mumkin. Shuningdek, Jinoyat kodeksining 236-moddasiga ham o‘zgartirishlar kiritildi.
Endi alohida muhofaza qilinadigan tabiiy hududlarga juda katta zarar yetkazilgan holatlarda jarima miqdori 500 hisoblash ko‘rsatkichi (48,7 million so‘m)gacha oshirildi. Bu chora-tadbirlar tabiiy muhitni muhofaza qilish va noyob hayvon turlarini asrashga qaratilgan.
