Mayduguridagi masjidda portlash: 7 kishi halok bo‘ldi
Nigeriyaning shimoli-sharqida joylashgan Mayduguri shahridagi masjidda portlash yuz berdi. Bu haqda Zamin.uz xabar berdi.
Ushbu fojia natijasida kamida yetti kishi halok bo‘ldi. Bu haqda BBC ma’lumot tarqatdi.
Hodisa 24-dekabr kuni soat 18:00 atrofida sodir bo‘lgan. Portlash Gamboru bozori hududida joylashgan, odamlar bilan to‘la masjidda, shom namozidan oldin yuz bergan.
Guvohlarning so‘zlariga ko‘ra, portlash kutilmaganda ro‘y bergan va masjid ichida katta sarosima yuzaga kelgan. Politsiya vakili Nahum Daso voqeani tasdiqladi va ayni paytda mutaxassislar voqea joyida tekshiruv ishlarini olib borayotganini bildirdi.
Ayrim guvohlar bu hujumni xudkush terrorchi amalga oshirgan bo‘lishi mumkinligini taxmin qilishmoqda. Rasmiylar yaradorlar soni haqida aniq ma’lumot bermagan, ammo ular bir necha o‘n nafar bo‘lishi mumkinligini aytishgan.
Mahalliy politsiya rahbari Babakura Kolo hodisani terrorchilik harakati sifatida baholadi. Biroq hozircha hech bir guruh ushbu hujum uchun javobgarlikni o‘z zimmasiga olgani yo‘q.
Ta’kidlash joizki, Mayduguri shahri Borno shtatining markazi hisoblanadi. Ushbu hudud avval Boko Haram va Islamic State West Africa Province kabi terrorchi guruhlar faoliyati bilan bog‘liq bo‘lgan.
So‘nggi yillarda shahar nisbatan tinchlikka erishgan edi, ammo bu fojia yana xavotirlarni kuchaytirdi.
