24-dekabrga o‘tar kechasi Tojikiston va Afg‘oniston chegarasida qurolli to‘qnashuv yuz berdi. Bu haqda Zamin.uz xabar berdi.
Bu hodisa Tojikistonning Shamsiddin Shohin tumanida sodir bo‘lgan. Tojikiston Milliy xavfsizlik davlat qo‘mitasi bergan ma’lumotga ko‘ra, voqea oqibatida ikki nafar tojikistonlik halok bo‘lgan.
Afg‘oniston tomondan uch nafar qurollangan shaxs Tojikiston chegarasidagi postga hujum qilgan. Ular chegara xodimlarining taslim bo‘lish haqidagi buyrug‘iga bo‘ysunmasdan, qurolli qarshilik ko‘rsatgan.
Rasmiy ma’lumotlarga ko‘ra, ushbu shaxslar chegaraga hujum qilishni avvaldan rejalashtirgan. To‘qnashuv davomida uchala shaxs zararsizlantirilgan.
Hodisa joyidan miltig‘lar, avtomatlar, qo‘l granatalari, portlovchi moddalar va boshqa o‘q-dorilar musodara qilingan. To‘qnashuvda Tojikistonning “Sarichashma” harbiy qismida xizmat qilgan 28 yoshli Ismatullo Qurbunov va 33 yoshli Zirebon Navro‘zbekov halok bo‘lgan.
Bu so‘nggi bir oy ichida Tojikiston va Afg‘oniston chegarasida sodir bo‘lgan uchinchi qurolli to‘qnashuvdir. Tojikiston hukumati Afg‘onistondagi “Tolibon” rahbariyatini chegarada xavfsizlikni ta’minlash choralarini kuchaytirishga chaqirdi.
Milliy xavfsizlik davlat qo‘mitasi chegarachilar mamlakat himoyasini ta’minlash uchun barcha zarur imkoniyatlarga ega ekanligini qayd etdi.
