Italiyada Melonining sovg‘alar auksioni bekor qilindi

Italiya bosh vaziri Jorja Meloni xizmat safari davomida olgan qimmatbaho sovg‘alarni auksion orqali sotishni rejalashtirgan edi. Bu haqda Zamin.uz xabar berdi.

Ammo ushbu reja bekor qilindi. Sababi, savdoni o‘tkazishi kerak bo‘lgan auksion uyi jinoiy tergovga tortilgan.

Sotuvga qo‘yilishi rejalashtirilgan buyumlar orasida O‘zbekiston Prezidenti Shavkat Mirziyoyev tomonidan hadya qilingan qimmatbaho toshlar bilan bezatilgan marjon ham bor edi. Ushbu sovg‘a Meloniga 2025 yil may oyida uning O‘zbekistonga rasmiy tashrifi chog‘ida topshirilgan.

Italiya qonunchiligiga ko‘ra, bosh vazir xorijiy davlat rahbarlaridan olingan va qiymati 300 yevrodan oshadigan sovg‘alarni shaxsiy mulk sifatida saqlay olmaydi. Bunday sovg‘alar davlat tasarrufida saqlanadi va faqat alohida hollarda ochiq savdoga chiqariladi.

Ma’lumotlarga ko‘ra, bekor qilingan auksiondan taxminan 800 ming yevro tushum olinishi va tushgan mablag‘ning katta qismi xayriya maqsadlariga yo‘naltirilishi rejalashtirilgan edi. Biroq hozirda bu tashabbus noma’lum muddatga qoldirildi.