Oqtovdagi samolyot halokati bo‘yicha tergov xulosasi e’lon qilindi
Qozog‘iston Transport vazirligi 2024-yil 25-dekabr kuni Oqtov yaqinida sodir bo‘lgan aviahalokat bo‘yicha dastlabki tergov natijalarini e’lon qildi. Bu haqda Zamin.uz xabar berdi.
Halokat «Azerbaijan Airlines» aviakompaniyasiga tegishli Embraer 190 samolyoti bilan yuz berdi. Bokudan Grozniyga yo‘l olgan samolyot bortida jami 67 kishi bo‘lgan.
Fojia natijasida 38 kishi, jumladan, 3 nafar ekipaj a’zosi halok bo‘ldi, 29 nafar yo‘lovchi esa turli darajadagi jarohatlar bilan omon qoldi. Halokat Ukraina dronlarining Kavkaz hududiga hujumi vaqtida sodir bo‘lgani aytilmoqda.
Samolyot yo‘nalishini Kaspiy dengizi orqali Qozog‘iston tomonga o‘zgartirgan vaqtda fojia yuzaga kelgan. Xalqaro komissiya (Ozarboyjon, Rossiya, Braziliya va ICAO vakillari) tomonidan olib borilgan tekshiruvlarda samolyotning konstruksiyasida jangovar qurol ta’siriga o‘xshash shikastlanish izlari aniqlangan.
Gidravlik tizim quvurlarida begona metall jismlar tufayli teshiklar hosil bo‘lgani qayd etilgan. Ammo ushbu qurolning kimga tegishli ekanligi hozircha aniqlanmadi.
Mazkur voqea Ozarboyjon va Rossiya o‘rtasida siyosiy tortishuvlarga sabab bo‘lmoqda. Ozarboyjon samolyot Rossiya havo mudofaa tizimi raketasi bilan urib tushirilgani ehtimolini ilgari surmoqda.
Rossiya esa tergov yakuniga qadar xulosa chiqarishga shoshilmaslikka chaqirmoqda. Hozirda ikki yo‘nalishda izlanishlar olib borilmoqda: mojaro hududlarida parvoz xavfsizligini tahlil qilish va samolyotning gidravlik tizimini rekonstruksiya qilish.
Tergovning yakuniy hisobotini 2025-yil oxiriga qadar Qozog‘iston Transport vazirligi e’lon qilishi kutilmoqda. Sizningcha, harbiy mojarolar davom etayotgan hududlar yaqinida fuqarolik aviatsiyasi parvozlarini butunlay taqiqlash kerakmi?
