AQSh Nigeriyada terrorchilarga qarshi havo zarbasi berdi
AQSh Nigeriya hukumatining iltimosiga binoan, mamlakat shimoli-g‘arbida joylashgan Sokoto shtatida “Islomiy davlat” terrorchilik guruhiga qarshi havo zarbasi uyushtirdi. Bu haqda Zamin.uz xabar berdi.
Ushbu operatsiya AQSh harbiylari va Nigeriya xavfsizlik kuchlari o‘rtasidagi hamkorlik doirasida amalga oshirilgan. AQSh harbiylari bergan ma’lumotlarga ko‘ra, zarba aniq razvedka ma’lumotlari asosida amalga oshirilgan bo‘lib, natijada bir necha terrorchi yo‘q qilingan.
Pentagon operatsiya davomida tinch aholi xavfsizligini ta’minlash birinchi darajali vazifa bo‘lganini alohida ta’kidladi. Nigeriya Tashqi ishlar vazirligi ushbu harbiy amaliyotni ikki davlat o‘rtasidagi xavfsizlik sohasidagi hamkorlikning muhim qismi sifatida baholadi.
Hukumat vakillari razvedka ma’lumotlari almashinuvi terrorchilikka qarshi samarali choralar ko‘rishda katta ahamiyatga ega ekanini bildirdi. Nigeriya hukumati mamlakatda zo‘ravonliklar turli diniy guruhlarga salbiy ta’sir ko‘rsatayotganini qayd etib, barcha fuqarolarning xavfsizligi va diniy erkinliklarini ta’minlash ustuvor vazifa ekanini ta’kidladi.
AQSh esa terrorizmga qarshi kurashda Nigeriyani qo‘llab-quvvatlashni davom ettirishini ma’lum qildi.
