Acheda siklon: Aholi yordam so‘rab oq bayroq ko‘tardi

Indoneziyaning g‘arbiy Ache provinsiyasida noyabr oyida yuz bergan kuchli siklon oqibatida yuzlab odam halok bo‘ldi, yuz minglab aholi esa boshpanasiz qoldi. Bu haqda Zamin.uz xabar berdi.

Eng ko‘p zarar ko‘rgan hudud aynan Ache bo‘lib, aholi hozirgacha toza suv, oziq-ovqat, elektr energiyasi va tibbiy yordamga muhtoj bo‘lib kelmoqda. Mahalliy aholi hukumatning sust harakatlarini tanqid qilib, oq bayroqlar ko‘tarib xalqaro yordam so‘ramoqda.

Hudud gubernatori ham vaziyatni ochiqchasiga tanqid qilgan bo‘lsa-da, Prezident Prabowo Subianto xalqaro yordamni rad etib, vaziyat nazorat ostida ekanini ta’kidladi. Favqulodda holat e’lon qilinmagani sababli yordam yetkazish ishlari kechikmoqda.

Oq bayroqlar odatda taslim bo‘lish ramzi sifatida qaralsa ham, Ache aholisi ularni xalqaro hamjamiyat e’tiborini jalb qilish uchun belgi sifatida ishlatmoqda. Siklon oqibatida ko‘plab qishloqlar vayron bo‘lgan, yo‘llar zarar ko‘rgan, aholi esa kasallik va ochlikdan aziyat chekmoqda.

Hukumat tiklash ishlari uchun 60 trillion rupiy (taxminan 3,6 milliard dollar) ajratganini ma’lum qildi. Aholi bu holatni 2004 yilda yuz bergan sunami bilan solishtirib, o‘sha paytda yordam tezkor yetkazilganini eslamoqda.

Tanqidchilar Prezident Prabowoning xalqaro yordamdan voz kechishini siyosiy obro‘sini saqlab qolish istagi bilan bog‘lamoqda. Shu bilan birga, palma yog‘i plantatsiyalarining kengayishi toshqinlarni kuchaytirgani ham ta’kidlanmoqda.