Salohning Rojdestvo posti bahs va tanqidlarga sabab bo‘ldi

Angliyaning "Liverpul" klubi va Misr milliy terma jamoasining mashhur futbolchisi Muhammad Saloh ijtimoiy tarmoqlarda joylagan so‘nggi posti bilan yana e’tibor markazida qoldi. Bu haqda Zamin.uz xabar berdi.

Bu safar futbolchi Rojdestvo bayrami munosabati bilan qoldirgan tabrigi ko‘plab bahs va tanqidlarga sabab bo‘ldi. Saloh o‘z sahifasida oilasi bilan bayram archasi fonida tushgan suratini joylab, unga “Rojdestvo bilan” degan heshtegni qo‘shdi.

Oddiy oilaviy surat sifatida ko‘ringan bu post qisqa vaqt ichida turli fikrlar va munosabatlarni keltirib chiqardi. Ayniqsa, musulmon obunachilar orasida tanqidiy izohlar ko‘paydi.

Ulardan biri Salohga murojaat qilib, “Men seni e’tiqodimizda man etilgan bayramni nishonlamaydi, deb o‘ylagandim”, deya fikr bildirdi. Yana bir foydalanuvchi esa hissiyotlarga boy munosabat qoldirdi: “Mo Saloh, men seni hatto "Manchester Siti" muxlisi bo‘lganimda ham hurmat qilardim.

Ammo bu postdan keyin seni o‘rnak sifatida ko‘ra olmayman. Agar uni o‘chirmasang, obunamni bekor qilaman.” Boshqa bir izohda esa Salohning musulmonlik va madaniyat qadriyatlariga hurmat ko‘rsatishi lozimligi ta’kidlandi.

Eng keskin izohlardan biri esa shunday edi: “Allohdan qo‘rq. Sen musulmonsan va millionlab odamlar senga ergashadi.

Ular sening qilayotgan ishingni oddiy hol deb qabul qilishi mumkin. Ammo bu musulmonlarga xos emas.

Sen xristianlarning Ramazon yoki Qurbon hayitini nishonlaganini ko‘rganmisan?” Eslatib o‘tish joiz, bu Salohning ilk marta tanqidga uchrashi emas. O‘tgan yili ham u xuddi shu sabab bilan tanqid qilingan edi.

Xulosa shuki, Muhammad Salohning har bir harakati, nafaqat maydonda, balki ijtimoiy tarmoqlarda ham doimiy e’tiborda. Mashhurlikning narxi esa ba’zan shunday bahs va munozaralar bilan o‘lchanadi.