Rajastanda suv tanqisligi sanoatga jiddiy ta’sir qilmoqda
Hindistonda suv resurslarining kamayishi yirik ichimlik mahsulotlari ishlab chiqaruvchi kompaniyalarga jiddiy bosim o‘tkazmoqda. Bu haqda Zamin.uz xabar berdi.
Ayniqsa, shimoli-g‘arbiy qismda joylashgan Rajastan shtatida suv tanqisligi sanoat va aholi ehtiyojlarini muvozanatlashni qiyinlashtirib yuborgan. Rajastanning katta hududi cho‘l mintaqasiga kirgani bois yer osti suvlari zaxiralari tez kamaymoqda.
Amaldagi qonunlarga muvofiq, mahsulotlarni shtatlararo tashish cheklangan. Shu sababli kompaniyalar suv yetishmovchiligiga qaramay, ishlab chiqarishni mazkur hududlarda davom ettirishga majbur bo‘lmoqda.
Bu holat esa mavjud suv resurslariga bo‘lgan bosimni yanada oshiryapti. Katta kompaniyalar suvdan foydalanishni kamaytirish uchun turli choralar ko‘rayotganini ma’lum qilmoqda.
Jumladan, zavodlarda suvni tejaydigan texnologiyalar joriy etilmoqda, yomg‘ir suvini yig‘ish va ishlatilgan suvni qayta tozalash ishlari olib borilmoqda. Shunga qaramay, ba’zi hududlarda suv olinishi uning tabiiy tiklanish darajasidan oshib ketmoqda.
Mahalliy aholi suv ta’minotidagi muammolardan norozi. Ayrim qishloqlarda ichimlik suvi haftada bor-yo‘g‘i bir marotaba yetkazib berilmoqda.
Hukumat esa suv resurslaridan foydalanishni nazorat qilish va suv tanqisligi kuzatilayotgan hududlarda cheklovlar joriy etishga intilmoqda. Mutaxassislar bu muammoni hal qilish uchun davlat, sanoat va jamiyatning birgalikdagi sa’y-harakatlari zarurligini ta’kidlamoqda.
