Ukraina Qurolli Kuchlari Rostov viloyatida joylashgan Novoshaxtinsk neftni qayta ishlash zavodiga Storm Shadow qanotli raketalari yordamida zarba berganini e’lon qildi. Bu haqda Zamin.uz xabar berdi.
Bu haqda Ukraina Qurolli Kuchlari Bosh shtabi 25-dekabr kuni o‘zining rasmiy Telegram-kanalida ma’lum qildi. Rasmiy axborotga ko‘ra, zarba aniq nishonga yetib borgan.
Bayonotda qayd etilishicha, hujum natijasida zavodda portlashlar sodir bo‘lgan va obyekt jiddiy zarar ko‘rgan. Ushbu zavod Rossiya armiyasi ehtiyojlari uchun dizel yonilg‘isi va aviatsiya kerosini ishlab chiqaruvchi muhim infratuzilma hisoblanadi.
Rostov viloyati gubernatori Yuriy Slyusar ham zarbalar berilganini tasdiqladi. Uning ma’lumotiga ko‘ra, portlashlar tufayli yong‘in kelib chiqqan va uni o‘chirish chog‘ida bir o‘t o‘chiruvchi jarohat olgan.
Zavodga yetkazilgan zarar ko‘lami hozircha aniq baholanmagan. Ukraina manbalari esa hodisa joyida qora tutun ustunlari ko‘tarilayotganini aks ettiruvchi videokadrlarni e’lon qildi.
Ma’lumotlarga ko‘ra, Ukraina keng ko‘lamli harbiy harakatlar boshlanganidan buyon ushbu zavodga kamida olti marta zarba bergan. Ammo bu safargi hujumda Storm Shadow raketalari qo‘llangani alohida ahamiyatga ega.
Novoshaxtinsk zavodi Ukraina nazoratidagi hududdan taxminan 175 kilometr uzoqlikda joylashgan. Shu bilan birga, Storm Shadow raketalarining uchish masofasi 250 kilometrdan ortiq bo‘lib, bu Ukraina uchun Rossiyaning chuqur orqasidagi infratuzilma obyektlarini nishonga olish imkoniyatini yaratmoqda.
Mazkur hujum nafaqat harbiy, balki logistika nuqtayi nazaridan ham muhim ahamiyat kasb etmoqda. Yonilg‘i ta’minoti va energetika inshootlariga qaratilgan bunday zarbalar front ortidagi bosimni kuchaytirishga xizmat qilmoqda.
