NASA olimlari NGC 2264 deb nomlangan noyob kosmik obyektning yangi tasvirini namoyish etdi. Bu haqda Zamin.uz xabar berdi.
Ushbu obyekt Yerdan taxminan 2 500 yorug‘lik yili uzoqlikda joylashgan. U tashqi ko‘rinishi bilan Yangi yil archasini eslatadi.
Mutaxassislarning fikricha, tasvirda ko‘rinib turgan yashil rang gaz va chang bulutlarining fazoga tarqalishi natijasida yuzaga kelgan. Bu jarayon obyektning archa shakliga o‘xshash ko‘rinish hosil qilishiga sabab bo‘lgan.
Yorqin nuqtalar esa yangi paydo bo‘layotgan va shakllanayotgan yulduzlarni ifodalaydi. Olimlarning ta’kidlashicha, bunday kuzatuvlar yulduzlarning tug‘ilishi, gaz bulutlarining tarqalishi va koinotdagi murakkab jarayonlarni chuqurroq o‘rganishga yordam beradi.
NASA tomonidan taqdim etilgan ushbu surat nafaqat ilmiy jihatdan, balki go‘zalligi bilan ham katta e’tibor qozondi. Bu kabi tasvirlar insoniyatni koinot sirlarini anglashga yana bir qadam yaqinlashtiradi.
