O‘zbekiston oshxonasi yana TasteAtlas reytingidan chetda qoldi

TasteAtlas tomonidan e’lon qilingan dunyoning 100 ta eng yaxshi oshxonasi reytingi yana muhokamalarga sabab bo‘ldi. Bu haqda Zamin.uz xabar berdi.

Afsuski, bu safar ham O‘zbekiston milliy oshxonasi ushbu nufuzli ro‘yxatdan o‘rin ololmadi. Mazkur reyting 19 mingdan ortiq taom va yarim milliondan ziyod foydalanuvchi tomonidan berilgan baholar asosida tuzilgan.

Reytingda dunyoning eng mashhur va ommaviy oshxonalari yetakchilik qilmoqda. Mutaxassislar bu natijani asrlar davomida shakllangan brend, kuchli gastronomik marketing va xalqaro ommalashuv omillari bilan izohlashmoqda.

Markaziy Osiyo mintaqasidan faqat Qozog‘iston milliy oshxonasi ro‘yxatga kirishga muvaffaq bo‘lgan. U 98-o‘rinni egallab, samosa, suvjo‘q, lag‘mon, kespe va bo‘rsak kabi taomlari bilan e’tirof etilgan.

O‘zbekiston oshxonasi esa xalqaro reytinglarda yetarlicha aks etmayotgani haqida avval ham bahslar bo‘lgan. Masalan, joriy yil fevral oyida o‘zbek taomlaridan biri — achchiq-chuchuk salati TasteAtlas tuzgan “dunyoning eng yomon taomlari” ro‘yxatida 43-o‘rinni egallagan edi.

Bu holat jamoatchilikda turli munozaralarga sabab bo‘lgan. Mutaxassislarning fikricha, O‘zbekiston oshxonasining reytinglarda kam ko‘rinishi uning ta’mi yoki an’analari bilan bog‘liq emas.

Asosiy muammo global targ‘ibot va marketingning yetarli darajada olib borilmayotganidadir. Palov, somsa va lag‘mon kabi taomlar xalqaro miqyosda sevib iste’mol qilinsa-da, global reytinglarda muvaffaqiyatga erishish uchun mazadan tashqari marketing ham katta ahamiyatga ega.

Shu bois, endilikda asosiy masala — milliy oshxonamizni dunyoga qanday tanitishda.