Masjidul Haramda o‘z joniga qasd qilishga urinish yuz berdi

Saudiya Arabistoni Ichki ishlar vazirligi Makka shahridagi Masjidul Haramning yuqori qavatidan bir erkak o‘zini tashlagani haqida rasmiy xabar berdi. Bu haqda Zamin.uz xabar berdi.

Ushbu voqea haqida "Khaleej Times" nashri ma’lumot tarqatdi. Masjidul Haram xavfsizligini ta’minlash uchun mas’ul bo‘lgan maxsus kuchlar bergan ma’lumotga ko‘ra, erkak o‘z joniga qasd qilish maqsadida binoning yuqori qismidan sakragan.

Hodisa paytida yaqin atrofda bo‘lgan xavfsizlik xodimi uning yerga qattiq zarba bilan tushishining oldini olishga harakat qilgan. Shu jarayonda xavfsizlik xodimi ham jarohat olgan.

Hozirda har ikkisi shifoxonaga joylashtirilib, ularga zarur tibbiy yordam ko‘rsatilmoqda. Voqea yuzasidan tegishli huquqiy tekshiruv ishlari yakuniga yetkazilgan.

Mazkur hodisaga munosabat bildirgan Masjidul Haram bosh imomi Abdur Rahmon as Sudays ziyoratchilarni muqaddas joy qoidalariga qat’iy rioya qilishga chaqirdi. U ziyoratchilarni belgilangan tartib-intizomni saqlashga va muqaddas maskanda bo‘lganda faqat ibodat va toatga e’tibor qaratishga undadi.

Bosh imom, shuningdek, Islom shariatining asosiy maqsadlaridan biri inson hayotini muhofaza qilish ekanini qayd etdi. U Alloh taoloning “O‘z qo‘llaringiz bilan o‘zlaringizni halokatga tashlamang” mazmunidagi oyatini eslatib, hayot inson uchun eng ulug‘ ne’mat ekanini ta’kidladi.