Ukraina Prezidenti Volodimir Zelenskiy o‘tgan juma kuni oliy bosh qo‘mondon stavkasi yig‘ilishida Rossiyaning yangi harbiy taktikasi haqida ma’lumot berdi. Bu haqda Zamin.uz xabar berdi.
Unga ko‘ra, Rossiya qo‘shinlari Belarus hududidan foydalanib, Ukrainadagi dronlarga qarshi himoya tizimlarini chetlab o‘tishga harakat qilmoqda. Yig‘ilishda dronlar tahdidi, havo mudofaa choralari va Ukraina tomonidan ko‘riladigan javob choralari muhokama qilingan.
Prezidentning so‘zlariga ko‘ra, Rossiya harbiylari Ukraina havo mudofaasi tizimlari va dronlarga qarshi texnologiyalarni diqqat bilan o‘rganib, ularni aylanib o‘tish strategiyasini qo‘llamoqda. Ukraina razvedkasi ma’lumotlariga ko‘ra, ayrim uskunalar Belarus hududida, xususan, aholi yashash joylari yaqinida yoki hatto turar joy binolari ustida joylashtirilgan.
Masalan, besh qavatli uylarning tomlarida dronlarni boshqarish uchun antennalar va aloqa vositalari o‘rnatilgani qayd etilgan. Zelenskiy bu holat tinch aholi xavfsizligini tahdid ostiga qo‘yishini ta’kidlab, Minskni bunday xavfli harakatlarni to‘xtatishga chaqirdi.
Shu bilan birga, Ukraina bosh vaziri Yuliya Sviridenko Rossiyaning 23 dekabrga o‘tar kechasi amalga oshirgan hujumlari natijasida mamlakat energetika infratuzilmasiga jiddiy zarar yetkazilganini ma’lum qildi. Ayniqsa, Rovno, Ternopil va Xmelnitskiy viloyatlarida elektr ta’minoti deyarli to‘liq uzilib qolgan.
25 dekabr kuni esa Rossiya dronlari Volin viloyatidagi muhim infratuzilma obyektini nishonga olgan. Kovel temiryo‘l stansiyasida lokomotiv va yuk vagonlari zarar ko‘rgan, shuningdek, depo binolarida portlash oqibatida oynalar sinib ketgan.
Ekspertlarning fikriga ko‘ra, Rossiya bu hujum orqali Ukraina va Polsha o‘rtasidagi logistika yo‘nalishlarini izdan chiqarishga urinmoqda. Belarus hozircha Rossiyaning Ukrainaga qarshi urushida bevosita ishtirok etmayotgan bo‘lsa-da, Rossiya Belarus hududidan foydalanayotgani xavotir uyg‘otmoqda.
Shu sabab Ukraina qo‘shinlarining bir qismi Belarus bilan chegarada joylashtirilgan, bu esa mamlakat mudofaa resurslariga qo‘shimcha bosim yuklamoqda.
