Saudiya Arabistoni Rojdestvoni nishonlashga ruxsat berdi
Saudiya Arabistoni musulmon bo‘lmagan diniy bayramlarni, jumladan Rojdestvoni nishonlashga rasmiy ruxsat berdi. Bu haqda Zamin.uz xabar berdi.
Ushbu qaror mamlakat valiahd shahzodasi va Bosh vaziri Muhammad bin Salmon Ol Saud tomonidan tasdiqlandi. Mahalliy ommaviy axborot vositalarining xabar berishicha, bu qaror qirollikning diniy siyosatida yangicha yondashuv hamda Islom talqinini zamonaviy talablar asosida qayta ko‘rib chiqish jarayonining bir qismi hisoblanadi.
Valiahd shahzoda mazkur siyosat boshqa din vakillarining e’tiqod erkinligini hurmat qilish tamoyiliga asoslanganini alohida ta’kidladi. Mazkur islohot natijasida Saudiya Arabistonida yashayotgan 13 milliondan ortiq musulmon bo‘lmagan aholi, asosan nasroniylar, o‘z diniy bayramlarini ochiq va erkin tarzda nishonlash imkoniyatiga ega bo‘ldi.
So‘nggi yillarda bu yo‘nalishda sezilarli o‘zgarishlar amalga oshirildi. Jumladan, 2022 yilda Rojdestvo archalari va bayram bezaklariga qo‘yilgan taqiq bekor qilindi.
2023–2024 yillarda esa Ar-Riyod va Jidda kabi yirik shaharlarda Rojdestvo yarmarkalari, tematik konsertlar va mehmonxonalarda bayram dasturlari tashkil etila boshlandi. Rasmiylar bu islohotlarni mamlakatning ochiqlik siyosati, madaniy xilma-xillikka hurmat va turizmni rivojlantirish strategiyasining muhim qismi sifatida baholamoqda.
