Japarov: “Hibsxona kurort emas, sabr-toqat kerak”
Qirg‘iziston Prezidenti Sadir Japarov tergov hibsxonalaridagi sharoitlar bo‘yicha bildirilayotgan e’tirozlarga munosabat bildirdi. Bu haqda Zamin.uz xabar berdi.
U bu borada o‘zining shaxsiy tajribasini misol qilib keltirdi va hibsxona sharoitlarini "kurort emas" deb ta’kidladi. Bu haqda Tengrinews.kz nashri xabar berdi.
Davlat rahbari siyosiy faoliyati davomida ikki marta tergov hibsxonasida bo‘lganini esladi. U jami to‘rt yarim yil hibsda o‘tirganini, birinchi marta to‘qqiz oy, ikkinchi marta esa uch yarim yil davomida qamoqda bo‘lganini aytib o‘tdi.
Japarov bu davr mobaynida sabr-toqat bilan yashaganini va biror marta shikoyat qilmaganini ta’kidladi. Prezidentning so‘zlariga ko‘ra, bugungi kunda Qirg‘izistonning jazoni ijro etish tizimida katta islohotlar amalga oshirilgan.
Endilikda mahbuslar kuniga uch mahal issiq ovqat bilan ta’minlanmoqda, ularga mavsumga mos maxsus kiyimlar berilmoqda. Shuningdek, mahkumlar mehnat bilan band bo‘lish imkoniyatiga ega bo‘lib, topgan daromadlarini oilalariga jo‘natishlari mumkin.
Eslatib o‘tamiz, Sadir Japarovga nisbatan asosiy jinoiy ish 2013 yilda Issiqko‘l voqealari sabab qo‘zg‘atilgan edi. U 2020 yilda xalq noroziliklari tufayli ozodlikka chiqdi va 2021 yilda Qirg‘iziston Prezidenti etib saylandi.
