Toshkentda avtoturargohlar joylashuvi yangi tartiblanadi
Toshkent shahrining dizayn-kodi loyihasi jamoatchilik muhokamasi uchun regulation.gov.uz portalida e’lon qilindi. Bu haqda Zamin.uz xabar berdi.
Mazkur hujjatda poytaxt hududida avtoturargohlarni tashkil etishga oid yangi yondashuvlar taklif etilgan. Ushbu loyiha transport harakati va shahar infratuzilmasini rivojlantirishga qaratilgan.
Loyihaga muvofiq, avtomobil to‘xtash joylari qatnov zichligi nisbatan past bo‘lgan ko‘chalarda, transport almashuv tugunlarida va shahar chekka hududlarida tashkil etilishi mumkin. Bunda avtoturargohlar va piyodalar hududi aniq chegaralar bilan ajratilishi shart qilib belgilangan.
Aksincha, avtomobil harakati yuqori bo‘lgan ko‘chalarda, piyodalar ko‘chalari va shahar maydonlarida avtoturargohlar tashkil etilishi cheklanadi. Mahallalarda esa kichik hajmdagi “parkovka cho‘ntaklari”ni tashkil etishga ruxsat beriladi.
Sovet davrida qurilgan yoki hozirgi zamonaviy uylar joylashgan hududlarda tarqoq to‘xtash joylari o‘rniga markazlashtirilgan avtoturargohlar qurish tavsiya etilmoqda. Bozorlar, madaniyat va dam olish maskanlari atrofidagi avtoturargohlar ulardan foydalanadigan odamlar sonidan kelib chiqib loyihalashtiriladi.
Nogironligi bo‘lgan shaxslar uchun alohida joylar ajratilishi va piyodalarga qulay sharoitlar yaratilishi ham ko‘zda tutilgan. Rekreatsion hududlarda avtoturargohlarni asosiy maydonlardan tashqariga ko‘chirish taklif qilingan.
Shuningdek, haydovchilarning avtomobillarini qoldirib, jamoat transportiga o‘tishini ta’minlaydigan “perexvat” turargohlari ustuvor yo‘nalish sifatida belgilangan. Ushbu chora-tadbirlar shahar transport tizimini optimallashtirishga xizmat qiladi.
