Kambodja va Tailand o‘zaro ziddiyatlarni bartaraf etish maqsadida o‘t ochishni to‘xtatish bo‘yicha kelishuvga erishdi. Bu haqda Zamin.uz xabar berdi.
Tailand Mudofaa vazirligi vakilining ma’lum qilishicha, sulh Toshkent vaqti bilan soat 10:00 da kuchga kirgan. Bu haqda ommaviy axborot vositalari xabar bermoqda.
Kelishuv kuchga kirganidan so‘ng, Tailand tomoni Kambodja bilan chegarada otishmalar kuzatilmagani haqida ma’lum qilgan. Xuddi shunday, Kambodja ham sulh buzilgani yuzasidan bayonot bermagan.
Kelishuvning bajarilishini ASEAN tashkiloti kuzatib boradi. Tomonlarning qo‘shma bayonotida harbiylar o‘z joylashuvlarini saqlab qolishi va qo‘shimcha harbiy kuchlarni harakatlantirmaslik bo‘yicha kelishib olingan.
Bundan tashqari, tinch aholiga nisbatan hech qanday kuch ishlatilmasligi borasida ham kelishuv mavjud. Shuningdek, Tailand tomoni sulh 72 soat davomida buzilmas ekan, 18 nafar kambodjalik askarni qaytarib berishini bildirgan.
Chegara mojarosi davomida ikki tomonning ma’lumotlariga ko‘ra, jami 101 kishi halok bo‘lgan, 500 mingdan ortiq aholi esa o‘z uylarini tark etishga majbur bo‘lgan. Harbiylar o‘zaro to‘qnashuvlarda raketa va artilleriyadan foydalangan.
Ma’lumotlarga ko‘ra, 2025 yilgi dunyoning eng kuchli armiyalari reytingida Kambodja 95-o‘rinni, Tailand esa 25-o‘rinni egallagan.
