Qirg‘iziston prezidenti Sadir Japarov mamlakatda ta’lim va tibbiyot sohalarida ishlovchi xodimlar uchun muhim yangilikni e’lon qildi. Bu haqda Zamin.uz xabar berdi.
Unga ko‘ra, 2026-yil 1-apreldan boshlab o‘qituvchilar va shifokorlarning ish haqi ikki barobarga oshiriladi. Ushbu qaror haqida prezident 25-dekabr kuni bo‘lib o‘tgan Xalq qurultoyida ma’lum qildi.
Prezidentning so‘zlariga ko‘ra, o‘qituvchi va shifokorlarning jamiyatdagi o‘rni juda muhim. Ular millat kelajagini tarbiyalaydi va inson salomatligini himoya qiladi.
Shu bilan birga, bugungi kunda ushbu kasb egalariga nisbatan hurmatsizlik, qo‘pol munosabat va zo‘ravonlik holatlari uchrayotgani muhim muammo ekanini ta’kidladi. Japarov bunday holatlarni madaniyatsizlikning yuqori ko‘rinishi deb atab, ushbu kasblarning obro‘-e’tiborini tiklash zarurligini qayd etdi.
Hozirda Qirg‘izistonda o‘qituvchilarning o‘rtacha maoshi 26 ming somni tashkil etadi (taxminan 3,5 million so‘m). 2026-yil aprelidan boshlab bu miqdor 52 ming somga (7 million so‘m) yetadi.
Maosh miqdori o‘qituvchining tajribasi, malaka darajasi va boshqa ko‘rsatkichlarga qarab belgilanadi. Masalan, shahar maktabida yangi ish boshlagan o‘qituvchining oyligi 36 800 somni tashkil etadi (taxminan 5 million so‘m), soliqlardan so‘ng esa 31 200 som (4,2 million so‘m) qo‘liga tegadi.
Shifokorlarning o‘rtacha maoshi hozirda 31 500 somni (taxminan 4,3 million so‘m) tashkil etadi. 2026-yil aprelidan boshlab bu summa 62 500 somga (8,6 million so‘m) yetadi.
Soliqlarni chegirgandan keyin shifokorlar o‘rtacha 50 ming som (6,9 million so‘m) daromad oladi. Chekka hududlarda 30 yillik tajribaga ega, yuqori malakali shifokorlar esa 91 700 som (12,6 million so‘m) oylik olishi mumkin.
Soliqlardan keyin bu raqam 75 700 somni (10,4 million so‘m) tashkil qiladi. Shuningdek, 2026-yil 1-apreldan boshlab har bir lavozim uchun 5000 som (680 ming so‘m) miqdorida qo‘shimcha prezidentlik kompensatsiyasi joriy etilishi ham rejalashtirilgan.
Ushbu qaror ta’lim va tibbiyot sohasida ishlovchilarning ijtimoiy maqomini oshirishga xizmat qilishi kutilmoqda.
