Rossiyada migrantlar uchun imtihonlar to‘liq elektronlashadi

Rossiyada 2026-yil 1-yanvardan boshlab xorijiy fuqarolar uchun rus tili, Rossiya tarixi va mamlakat qonunchiligi bo‘yicha bilimni tekshirish tartibi to‘liq elektron shaklga o‘tkaziladi. Bu haqda Zamin.uz xabar berdi.

Ushbu yangilik patent yoki yashash guvohnomasini olishni rejalashtirgan barcha shaxslar uchun amal qiladi. Mamlakat Ta’lim va fan vazirligi imtihonlarni kompyuter orqali o‘tkazishga rasman o‘tishini tasdiqladi.

Bu haqda podrobno.uz xabar berdi. Mazkur islohotning asosiy maqsadi baholash jarayonidagi inson omilini kamaytirish, shaffoflikni oshirish va korrupsiya xavfini bartaraf etishdir.

Endilikda qog‘oz blankalar va videoyozuvsiz yuzma-yuz suhbatlar amaliyoti bekor qilinadi. Test sinovlari masofaviy texnologiyalar yordamida o‘tkaziladi.

Bu esa nazorat organlariga imtihon jarayonini real vaqt rejimida kuzatish imkonini beradi. Shuningdek, topshiriqlar bo‘yicha maxfiylik kuchaytiriladi.

Ilgari e’lon qilingan javoblarni ochiq tarqatish amaliyoti bekor qilinadi. Imtihon savollari bazasi har oy yangilanib boradi, bu esa eski shpargalkalar yoki sotib olingan javob kalitlarining ish bermasligiga olib keladi.

Reforma doirasida imtihon qabul qilish huquqiga ega tashkilotlar ro‘yxati ham tartibga solinadi. Endi faqat davlat muassasalariga ushbu vakolat beriladi va ularning faoliyati Rosobrnadzor tomonidan qat’iy nazorat qilinadi.

Ushbu markazlashtirish orqali test topshirmasdan sertifikat olishni va’da qiluvchi vositachilar va noqonuniy sxemalarni yo‘q qilish ko‘zda tutilgan.