Yaponiyada 57 ta avtomobil ishtirokida yirik avariya
Yaponiyada katta yo‘l-transport hodisasi sodir bo‘ldi. Bu haqda Zamin.uz xabar berdi.
Hodisa natijasida 57 ta avtomobil zanjirli to‘qnashuvga duch keldi. Avtohalokat oqibatida bir nechta mashina yonib ketdi va qutqaruv ishlari bir necha soat davom etdi.
Ma’lumotlarga ko‘ra, voqea Gunma prefekturasidagi Kanetsu tezyurar yo‘lida juma kuni soat 19:30 atrofida yuz bergan. Dastlabki xulosalarga ko‘ra, ikki yuk mashinasining to‘qnashuvi zanjirli avariyaga sabab bo‘lgan.
Bu hodisa oqibatida yo‘lning turli qismlarida 57 ta transport vositasi to‘xtab qolgan. Kuchli to‘qnashuvlar natijasida 10 dan ortiq avtomobil yonib ketgan.
Yong‘inni o‘chirish uchun o‘t o‘chiruvchilarga 7,5 soat vaqt kerak bo‘lgan. Qutqaruvchilar yuqori harorat va portlash xavfi sharoitida ish olib borishgan.
Politsiya bergan ma’lumotlarga ko‘ra, hodisa oqibatida ikki kishi halok bo‘lgan. Ular yonib ketgan avtomobillardan topilgan.
Halok bo‘lganlardan biri 77 yoshli ayol ekani tasdiqlangan. Shuningdek, 26 nafar inson jarohat olgan, ulardan besh nafari og‘ir ahvolda shifoxonaga yotqizilgan.
Tergovchilar fojeaning asosiy sababi sifatida noqulay ob-havo sharoitini ko‘rsatmoqda. Qor yog‘ishi va yo‘lning sirpanchiq bo‘lishi haydovchilar uchun xavfli vaziyatni yuzaga keltirgan.
Ayni paytda Kanetsu tezyurar yo‘li Yuzava va Sukiyono chorrahalari orasida har ikki yo‘nalishda ham yopiq qolmoqda. Evakuatorlar shikastlangan transportlarni olib chiqishni boshlagan, ammo yo‘lni to‘liq xavfsiz holatga keltirish uchun yana vaqt talab etilishi ma’lum qilinmoqda.
