Fransiya prezidenti Emmanuel Makronning rasmiy qarorgohi bo‘lmish Yelisey saroyida kutilmagan o‘g‘rilik holati aniqlangan. Bu haqda Zamin.uz xabar berdi.
Saroy xodimlaridan biri qimmatbaho kumush va chinni idishlarni yashirin tarzda olib chiqib, internet orqali sotganlikda gumon qilinmoqda. Ushbu buyumlarning umumiy qiymati taxminan 40 ming yevroga baholangan.
Mazkur ish bo‘yicha yana ikki gumondor ham qo‘lga olingan. Bu haqda Parij prokuraturasi ma’lumotiga asoslanib, The Guardian xabar berdi.
Tergov davomida aniqlanishicha, milliy meros hisoblangan Sevra korxonasiga tegishli nodir chinni buyumlar uzoq vaqt davomida qarorgoh xodimi tomonidan yashirincha olib chiqilgan. Keyin bu buyumlar onlayn savdo platformalarida sotuvga qo‘yilgan.
Holat Sevra korxonasining mutaxassislari tomonidan fosh etilgan. Ular internetda saroyga tegishli noyob idishlarni ko‘rib qolishgan va bu haqda xabar bergan.
Tergov jarayonida gumondorlardan taxminan 100 ta buyum musodara qilinib, Yelisey saroyiga qaytarilgan. Musodara qilingan buyumlar orasida Baccarat kristallari va Lalique ustaxonasida yaratilgan asarlar ham bor.
Ayblanuvchilar 10 yilgacha ozodlikdan mahrum etish jazosi bilan yuzlashishi mumkin. Sud majlisi 2026 yil 26 fevral kuni bo‘lib o‘tishi belgilangan.
Bu kabi o‘g‘rilik holatlari Fransiyada boshqa madaniy obyektlarda ham kuzatilgan. Yaqinda Luvr muzeyidan Napoleon va Jozefinaga tegishli bo‘lgan qimmatbaho zargarlik buyumlari o‘g‘irlangan edi.
Ushbu o‘g‘irlik natijasidagi zarar 88 million yevroga baholangan. Mazkur voqea ortidan gumondorlarning ayrimlari aeroportda qo‘lga olingan.
