Qozog‘istonning Olmaota shahri yaqinidagi tog‘li hududda bedarak yo‘qolgan uch nafar sayyohning jasadlari topildi. Bu haqda Zamin.uz xabar berdi.
Bu haqda mamlakat Favqulodda vaziyatlar vazirligi rasmiy xabar berdi. Ma’lum bo‘lishicha, 26-dekabrga o‘tar kechasi 112 xizmatiga bir ayol tomonidan murojaat qilingan.
Ayol o‘z akasi va ikki do‘sti 24-dekabr kuni ertalab tog‘larga yo‘l olgani, ammo shu vaqtgacha qaytmaganini bildirgan. Ularning mobil telefonlari 12 soatdan ortiq vaqt davomida o‘chirilgan holatda bo‘lgan.
Xabar kelib tushganidan so‘ng qidiruv-qutqaruv ishlari darhol boshlangan. Amaliyotda qutqaruvchilar, politsiya, Falokatlar tibbiyoti markazi mutaxassislari, kinologik guruhlar va ko‘ngillilar ishtirok etgan.
Shuningdek, dronlar va vertolyot yordamida hudud havodan kuzatilgan. Qidiruv natijasida “Lokomotiv” cho‘qqisi yaqinida, dengiz sathidan 3700 metr balandlikda jasadlar aniqlangan.
Marhumlar vertolyot yordamida pastga tushirilgan va huquqni muhofaza qiluvchi organlarga topshirilgan. Hozirda sud-tibbiy ekspertiza o‘tkazilmoqda.
Mazkur hodisadan so‘ng Qozog‘iston Favqulodda vaziyatlar vazirligi fuqarolarni tog‘li hududlarga chiqishda xavfsizlik qoidalariga qat’iy rioya qilishga chaqirdi. Mutaxassislar ob-havo sharoitlarini oldindan tekshirish, qor ko‘chkisi xavfini hisobga olish, yolg‘iz sayohat qilmaslik va yaqinlarga o‘z harakat rejasini oldindan xabar qilishni tavsiya etmoqda.
