Rossiyada 2026 yil "Xalqlar birdamligi yili" bo‘ladi

Rossiya prezidenti Vladimir Putin 2026 yilni "Rossiya xalqlari birdamligi yili" deb e’lon qildi. Bu haqda Zamin.uz xabar berdi.

Bu yil mamlakatdagi ko‘p millatli jamiyatda o‘zaro hurmat, hamjihatlik va barqarorlikni mustahkamlashga qaratilgan. Ushbu tashabbus Rossiyaning turli millat va elat vakillarini birlashtirish maqsadini ko‘zlaydi.

Ma’lum qilinishicha, yilni shunday nomlash taklifini prezidentga Butunrossiya kazaklar jamiyati vakili Vitaliy Kuznetsov bergan. Vladimir Putin bu g‘oyani qo‘llab-quvvatlab, Rossiyada millatlararo va dinlararo munosabatlar so‘nggi yillarda ijobiy rivojlanayotganini ta’kidladi.

Uning so‘zlariga ko‘ra, Rossiyada 190 dan ortiq millat va elat vakillari yashaydi. Ularning xilma-xilligi mamlakatning boyligi hisoblanadi va uni asrash davlat siyosatining ustuvor yo‘nalishlaridan biri bo‘lib qoladi.

Shuningdek, prezident 2027 yilni "Geografiya yili" deb e’lon qilish tashabbusini ham ilgari surdi. Bu yilda Rossiya tarixi va hududiy rivoji bilan bog‘liq muhim geografik yubileylar nishonlanishi rejalashtirilgan.

Ushbu qarorlar milliy birdamlikni mustahkamlash, tarixiy meros va umumiy qadriyatlarga e’tiborni kuchaytirishga xizmat qilishi kutilmoqda.