Rossiya prezidenti Vladimir Putinning boshqaruvi ostida mamlakatdagi eng boy tadbirkorlar, ya’ni milliarderlari, siyosiy ta’sirini deyarli yo‘qotdi. Bu haqda Zamin.uz xabar berdi.
Ayniqsa, Ukraina bilan urush boshlanganidan keyin Rossiyadagi milliarderlari soni rekord darajaga yetdi. Ularning aksariyati esa Putinning siyosatiga itoat qilishni afzal ko‘rdi.
2022-yil 24-fevral kuni, Ukraina hududiga keng ko‘lamli harbiy hujum boshlangan paytda, Putin eng boy tadbirkorlarni Kremlda to‘plab, ularga yangi sharoitlarda birgalikda ishlash zarurligini ta’kidladi. Ushbu yig‘ilishdan so‘ng ko‘plab tadbirkorlar sukut saqlashga majbur bo‘ldi.
Ayrimlari esa boyliklarining bir qismini yo‘qotdi yoki mamlakatni tark etdi. Urush va G‘arb sanksiyalari davrida Kremlga sodiq qolgan tadbirkorlar yangi imkoniyatlardan foyda ko‘rdi.
2023 va 2024-yillarda urushga ajratilgan mablag‘lar Rossiya iqtisodiyotining ayrim sohalarida o‘sishga sabab bo‘ldi. Bu esa harbiy buyurtmalarni olgan tadbirkorlarga hamda boshqa milliarderlarga daromad olib keldi.
Natijada, Kremlga sodiq tadbirkorlar boyliklarini ko‘paytirish imkoniga ega bo‘ldi. Shu bilan birga, Putin itoatsizlik qilgan tadbirkorlarga nisbatan qattiq chora ko‘rishni davom ettirdi.
Masalan, Mixail Xodorkovskiy kabi demokratik tashabbuslar bilan shug‘ullangan shaxslar qamoqqa olinib, mol-mulklaridan mahrum qilindi. Hozirgi sharoitda esa deyarli barcha yirik boylar urushga qarshi fikr bildirmasdan, sukut saqlashga majbur bo‘lishmoqda.
