Sobiq afg‘on harbiylari Britaniya armiyasida xizmat qilmoqchi
Tolibon hokimiyatni qo‘lga kiritgach, Buyuk Britaniyaga ko‘chib o‘tgan sobiq afg‘on harbiylari Britaniya armiyasida xizmat qilish istagini bildirmoqda. Bu haqda Zamin.uz xabar berdi.
Afg‘onistonlik mayor Nur Aziz Ahmadzai o‘zi va sobiq hamkasblarini Britaniya armiyasiga qabul qilishni so‘rab murojaat qilganini ma’lum qildi. Nur o‘z faoliyatini 16 yoshida maxsus politsiya safiga qo‘shilishdan boshlagan.
Keyinchalik u britaniyalik harbiylar uchun tarjimon bo‘lib ishlagan va Afg‘oniston maxsus kuchlariga o‘tgan. Shuningdek, Nur Buyuk Britaniyadagi harbiy akademiyada ikki yarim yil tahsil olib, Afg‘onistonda maxsus aksilterror bo‘linmasi qo‘mondonining o‘rinbosarigacha yetishgan.
2021-yil avgustidan buyon Nur Buyuk Britaniyada yashab kelmoqda. U va boshqa afg‘on harbiylari Afg‘onistonda hayot xavfli bo‘lgani sababli Britaniyaga ko‘chirib kelingan.
Hozir ularga vaqtinchalik boshpana berilgan, ammo ko‘plari hali ham uy-joy muammosiga duch kelmoqda. Britaniya armiyasiga faqat mamlakat fuqarolari ariza topshirishi mumkin, bu esa kamida besh yil davomida mamlakatda yashashni talab qiladi.
Shunga qaramay, Nur va uning sobiq hamkasblari o‘z harbiy tajribalarini Britaniya qurolli kuchlarida qo‘llashni xohlaydi. Ayni paytda bu masala yuzasidan rasmiylar bilan muzokaralar olib borilmoqda.
