Rossiya Eronning uchta sun’iy yo‘ldoshini uchirdi
Rossiya Eronga tegishli uchta sun’iy yo‘ldoshni fazoga muvaffaqiyatli uchirdi. Bu haqda Zamin.uz xabar berdi.
Bu haqda 28-dekabr kuni Reuters agentligi xabar berdi. Ma’lum qilinishicha, Eronning “Kosar”, “Paya” va “Zafar-2” nomli sun’iy yo‘ldoshlari Rossiyaning “Soyuz” raketasi yordamida Uzoq Sharqdagi Vostochniy kosmodromidan uchirilgan.
Sun’iy yo‘ldoshlar Yerning past orbitasiga, taxminan 500 kilometr balandlikka joylashtirildi. Ushbu balandlik kuzatuv va ma’lumot yig‘ish maqsadlari uchun eng maqbul hisoblanadi.
Eron rasmiylariga ko‘ra, mazkur sun’iy yo‘ldoshlar qishloq xo‘jaligi, atrof-muhit monitoringi, yer resurslarini kuzatish va tabiiy ofatlarni barvaqt aniqlash kabi vazifalarni bajaradi. Bu orqali Eron iqlim o‘zgarishlari, suv resurslari va hosildorlikni nazorat qilish imkoniyatlarini rivojlantirishni maqsad qilmoqda.
dpa agentligining eslatishicha, Eron avval ham bir necha marta sun’iy yo‘ldoshlarni fazoga chiqarishga muvaffaq bo‘lgan. Mamlakat rasmiylari bu dastur tinch maqsadlarga qaratilganini va harbiy yo‘nalishga ega emasligini ta’kidlashda davom etmoqda.
Eron tashqi ishlar vaziri Abbos Arog‘chi ushbu uchirishni “ilmiy missiya” deb atadi va bu jarayon texnologik rivojlanishning tabiiy qismi ekanini aytdi. Shu bilan birga, Isroil va G‘arb davlatlari, jumladan AQSH, Eronning kosmik dasturiga shubha bilan qaramoqda.
Ular ushbu texnologiyalar harbiy maqsadlarda, xususan, ballistik raketa imkoniyatlarini kengaytirish uchun qo‘llanilishi mumkinligini xavotir bilan tilga olmoqda. Ayrim tanqidchilar esa Eronning kosmik loyihalarida harbiy tuzilmalar, xususan, Islom inqilobi muhofizlari korpusi ishtirok etayotganini ta’kidlamoqda.
Rossiya orqali amalga oshirilgan ushbu uchirish nafaqat ilmiy, balki geosiyosiy ahamiyatga ham ega. Bir tomondan, Eron tinch maqsadlarini ta’kidlamoqda, ikkinchi tomondan esa G‘arb davlatlari bu jarayonni mintaqaviy xavfsizlik nuqtayi nazaridan diqqat bilan kuzatmoqda.
