Indoneziyada qariyalar uyidagi yong‘inda 16 kishi halok bo‘ldi
Indoneziyaning Shimoliy Sulavesi provinsiyasidagi Manado shahrida joylashgan Damai qariyalar uyida yong‘in sodir bo‘ldi. Bu haqda Zamin.uz xabar berdi.
Hodisa oqibatida 16 kishi halok bo‘lib, 3 kishi jarohat oldi. Yong‘in mahalliy vaqt bilan yakshanba kuni soat 20:30 atrofida boshlangan.
Shahar yong‘in va qutqaruv boshqarmasi rahbari Jimmi Rotinsuluning ma’lum qilishicha, ko‘plab qurbonlar o‘z xonalarida topilgan. Ularning aksariyati kechki dam olish vaqtida bo‘lgan qariyalar edi.
Yong‘in bir soat davomida o‘chirilgan. Hodisaning sabablarini aniqlash uchun politsiya tergov ishlarini olib bormoqda.
Mahalliy rasmiylar qurbonlarning jasadlari tanib bo‘lmas holatda ekanligini bildirgan va ularning oilalarini jasadlar olib ketilgan shifoxona bilan bog‘lanishga chaqirgan. Yong‘in paytida mahalliy aholi evakuatsiya ishlariga faol yordam bergan.
Indoneziyada bunday yong‘in hodisalari tez-tez ro‘y berib turadi. Shu oyning boshida Jakarta shahridagi yetti qavatli ofis binosida yong‘in sodir bo‘lib, 22 kishining hayotiga zomin bo‘lgan edi.
