Balendra Shah Nepal bosh vazirligiga nomzod bo‘ldi
Sobiq rep ijrochisi Balendra Shah 2026 yil 5 aprel kuni o‘tkaziladigan parlament saylovlarida Nepal bosh vaziri lavozimi uchun o‘z nomzodini qo‘yadi. Bu haqda Zamin.uz xabar berdi.
Bu haqda Reuters axborot agentligi xabar bergan. Balendra Shah yaqinda Milliy mustaqil partiya (RSP) safiga qo‘shildi.
Ushbu partiyaga ilgari teleboshlovchi sifatida tanilgan Rabi Lamichxane rahbarlik qiladi. Agar saylovda RSP g‘alaba qozonsa, partiya hukumat boshqaruvini aynan Balendra Shahga topshirishi kutilmoqda.
Siyosiy tahlilchi Bipin Adxikari fikriga ko‘ra, Balendra Shah va uning yosh tarafdorlarini o‘z safiga qo‘shish partiya uchun muvaffaqiyatli va strategik qaror bo‘lgan. Uzoq yillardan beri siyosiy maydonda yetakchilik qilib kelayotgan eski partiyalar esa yoshlardan ayrilib qolish xavotirida.
Yoshlar yangi siyosiy kuchni qo‘llab-quvvatlashlari mumkinligi bu xavotirni kuchaytirgan. Nepal siyosati so‘nggi 30 yil davomida asosan Nepal Kommunistik partiyasi va markazchi “Nepal kongressi” tomonidan boshqarilgan.
Nepal Markaziy saylov komissiyasi ma’lumotiga ko‘ra, mamlakatda 30 million aholining 11 millioni parlament saylovlarida ovoz berish huquqiga ega. Balendra Shahning siyosiy maydonga chiqishi 2025 yilda boshlangan ommaviy noroziliklar paytida yanada yaqqol sezilgan.
Ushbu norozilik namoyishlari yoshlar orasida katta qo‘llab-quvvatlovga ega bo‘lib, korrupsiyaga qarshi kurash va ijtimoiy tarmoqlardagi cheklovlarni bekor qilishni talab qilgan. Natijada hukumat boshlig‘i Xadga Prasad Sharma Oli iste’foga chiqqan.
Balendra Shah 1990 yil 27 aprelda Nepalda tug‘ilgan. U ijodiy faoliyatini rep ijrochisi sifatida boshlagan va "Balen" taxallusi bilan tanilgan.
Keyinchalik u qurilish muhandisligi bo‘yicha ta’lim olib, jamoatchilik faoliyatiga kirishgan. 2022 yilda esa mustaqil nomzod sifatida saylovda g‘olib chiqib, Katmandu shahri meri lavozimini egallagan.
