Xitoyda Lanying R6000 konvertoplani ilk sinovdan o‘tdi

Xitoyning Chjetszyan provinsiyasida og‘irligi 6 tonna bo‘lgan Lanying R6000 nomli uchuvchisiz konvertoplan ilk sinov parvozini muvaffaqiyatli amalga oshirdi. Bu haqda Zamin.uz xabar berdi.

Bu haqda Global Times nashri xabar berdi. Mazkur qurilma vertolyotga xos manevrlilikni va samolyotga xos yuqori tezlikni birlashtirishi bilan ajralib turadi.

Uning konstruktsiyasi havoda parvoz vaqtida vintlar holatini o‘zgartirish imkonini beradi. Shu sababli, konvertoplan odatdagi uchish-qo‘nish yo‘laklariga ehtiyoj sezmaydi.

U hatto tog‘li hududlar va shaharlar orasidagi tayyorlanmagan maydonchalarda ham samarali ishlashi mumkin. Qurilma vertikal tarzda havoga ko‘tarilib, 500 km/soatdan yuqori tezlikka erishishi qayd etilgan.

Lanying R6000 turli sohalarda qo‘llanishi rejalashtirilmoqda. Xususan, uni aviatsiya sohasida va tibbiy tashuvlarda ishlatish mo‘ljallangan.

Mazkur sinovlar Xitoyning past balandlikdagi aviatsiyani rivojlantirish strategiyasi doirasida o‘tkazilgan bo‘lib, bu texnologiya kelajakda keng imkoniyatlar yaratishi kutilmoqda.