Yamandagi urush davomida Saudiya Arabistoni va Birlashgan Arab Amirliklari (BAA) o‘rtasidagi munosabatlar keskinlashmoqda. Bu haqda Zamin.uz xabar berdi.
Bu holat Yaman hukumatidagi ichki tarqoqlik va ikki davlatning turli siyosiy-harbiy guruhlarni qo‘llab-quvvatlashidan kelib chiqmoqda. 30-dekabrga o‘tar kechasi Saudiya harbiy aviatsiyasi Yaman janubidagi Mukalla portiga zarba berdi.
Saudiya Tashqi ishlar vazirligi ma’lumotiga ko‘ra, portda BAA tomonidan keltirilgan qurol-aslahalar va zirhli texnikalar nishonga olingan. Shundan so‘ng, Yaman Prezidentlik rahbariyati kengashi raisi Rashad al-Alimiy BAA bilan harbiy hamkorlikni bekor qilganini e’lon qildi.
U Amirliklar harbiylaridan mamlakatni tark etishni talab qildi hamda BAAni ichki urushni qo‘zg‘atayotganlikda aybladi. Saudiya Arabistoni ham bu talabni qo‘llab-quvvatladi.
Saudiya Arabistoni va BAA 2015-yildan beri xalqaro koalitsiyaga a’zo bo‘lib, Yaman hukumatini husiylarga qarshi qo‘llab keladi. 2022-yilda Prezidentlik rahbariyati kengashi tuzilib, Yaman shimolidagi hududlarni qayta nazorat qilish maqsad qilingan edi.
Ammo janubiy kuchlar mustaqillik talabini oshirishi ichki ziddiyatlarni kuchaytirdi. Saudiya Arabistoni dunyoviy millatchilarga tayanayotgan bo‘lsa, BAA Janubiy o‘tish kengashini qo‘llab kelmoqda.
Bu BAAning strategik dengiz yo‘llaridagi manfaatlari bilan bog‘liq. Jumladan, Adan va Mukalla portlari hamda Bob ul-Mandab bo‘g‘ozi janubiy kuchlar nazoratida.
Hadramaut viloyatida 2025-yil kuzida BAA qo‘llab-quvvatlaydigan “Al-Hirak” harakati bilan Saudiya tarafdori bo‘lgan qabilalar o‘rtasida mojaro keskinlashdi. Dekabr boshida “Al-Hirak” hujumga o‘tib, hukumat kuchlarini janubdan siqib chiqargani xabar qilindi.
Shu bilan birga, Prezidentlik rahbariyati kengashi Ar-Riyodga ko‘chib, BAA bilan ittifoq uzilganini e’lon qildi. Janubiy Yamanga havo va dengiz blokadasi joriy etildi.
Saudiya Arabistoni BAAni “birodar davlat” deb atasa-da, separatistlarni qo‘llab-quvvatlash xavfli ekanini ta’kidladi. BAA esa hozircha rasmiy izoh bermagan.
