Rossiya Belarusda "Oreshnik" raketa tizimini joylashtirdi
Rossiya Mudofaa vazirligi 30-dekabr kuni “Oreshnik” raketa majmuasi Belarus hududida jangovar navbatchilikka qo‘yilganini rasman e’lon qildi. Bu haqda Zamin.uz xabar berdi.
Ushbu tizim haqida videolavha vazirlikning Telegram sahifasida taqdim etilgan. Rossiyaning RIA “Novosti” va TASS axborot agentliklari ma’lumotlariga ko‘ra, bu videoda “Oreshnik” ilk bor ochiq namoyish etilgan.
Raketa majmuasining aniq joylashuvi haqida rasmiy ma’lumot berilmagan. Biroq harbiy tahlilchilar sun’iy yo‘ldosh tasvirlariga asoslanib, majmua Belarusning sharqida joylashgan Krichev shahri atrofida bo‘lishi mumkinligini taxmin qilmoqda.
Ushbu hudud Minskdan taxminan 300 kilometr, Ukraina chegarasidan esa 180 kilometr masofada joylashgan. Belarus prezidenti Aleksandr Lukashenko 10-dekabr kuni Rossiyadan mamlakat hududiga “o‘nlab” taktik yadroviy jangovar qismlar olib kirilganini ma’lum qilgan.
Unga ko‘ra, “Oreshnik” raketalari sovet davrida strategik yadroviy qurollar joylashtirilgan maxsus hududlarga o‘rnatiladi. Lukashenko Belarusda bunday obyektlar soni 30 taga yaqin ekanini aytib o‘tgan.
Lukashenkoning so‘zlariga ko‘ra, ushbu qaror tajovuz sifatida emas, balki mintaqada kuchayib borayotgan xavf-xatar va zamonaviy tahdidlarga qarshi choralar sifatida qabul qilingan. Shuningdek, Rossiya prezidenti Vladimir Putin 2024-yilning 21-noyabr kuni Ukrainadagi Dnipro shahriga yadroviy bo‘lmagan gipertovushli ballistik raketa zarbasi berilganini ma’lum qilgan edi.
Putin bu amaliyotda eng yangi o‘rta masofali “Oreshnik” tizimi qo‘llanganini ta’kidlagan. Rossiya ma’lumotlariga ko‘ra, ushbu raketaning uchish masofasi 1000 kilometrdan 5500 kilometrgacha yetadi.
