Tashiyev: “Davlat tilini o‘rganish majburiy!”
Qirg‘iziston Milliy xavfsizlik davlat qo‘mitasi raisi Qamchibek Tashiyev Xitoyning China Road kompaniyasi vakillariga davlat tilini o‘rganish zarurligini qat’iy ta’kidladi. Bu haqda Zamin.uz xabar berdi.
Ushbu masala Issiqko‘l viloyatida avtomobil yo‘llari qurilishiga bag‘ishlangan ishchi yig‘ilishda muhokama qilindi. Yig‘ilish davomida Tashiyev Barskoon — Qorako‘l avtomobil yo‘lining qurilishi bilan qaysi kompaniya shug‘ullanayotganini so‘radi.
China Road kompaniyasi vakili rus tilida javob berib, loyiha aynan ular tomonidan amalga oshirilayotganini bildirdi. Biroq, Tashiyev kompaniyaning ayrim xodimlari hali ham davlat tilini bilmasligini keskin tanqid qildi.
Tashiyevning so‘zlariga ko‘ra, ushbu kompaniya Qirg‘iziston hududida 20 yildan ortiq vaqt faoliyat yuritayotgan bo‘lsa-da, uning vakillari qirg‘iz tilini o‘rganishga e’tibor bermagan. U chet ellik mutaxassislar mahalliy tilga hurmat bilan yondashishi va uni o‘rganishi shartligini alohida uqtirdi.
“Qirg‘izistonda 20 yil ishlabsizlar, ammo hali ham davlat tilini o‘rganmagansizlar. Nega?
Davlat tilini bilish va qirg‘izcha gapirishni o‘rganish majburiy!”, — dedi u qat’iy ohangda. China Road kompaniyasi vakili Tashiyevning tanqidini jim qabul qilib, uning talablariga roziligini bildirdi.
Shuningdek, yig‘ilishda 75 kilometrlik avtomobil yo‘li qurilishi muddatlari ham ko‘rib chiqildi. Kompaniya vakili loyiha amaldagi shartnomaga ko‘ra, 2028 yil 1 sentyabrgacha yakunlanishi kerakligini ta’kidladi.
Biroq, ish sur’atini oshirish orqali qurilishni 2027 yil oxirigacha tugatishga harakat qilishga va’da berdi. Mazkur voqea Qirg‘iziston rahbariyatining davlat tili masalasiga va infratuzilma loyihalarida intizom va mas’uliyatga bo‘lgan jiddiy munosabatini yana bir bor ko‘rsatdi.
