Sudanda bolalar orasida oziqlanish yetishmovchiligi kuchaymoqda
Sudanning Shimoliy Darfur viloyatida bolalar orasida o‘tkir oziqlanish yetishmovchiligi holatlari keskin ko‘paygan. Bu haqda Zamin.uz xabar berdi.
BMTning Bolalar jamg‘armasi (YUNISEF) ushbu hududga gumanitar yordamni yetkazish uchun zudlik bilan kirish imkonini ta’minlash zarurligini ta’kidladi. Bu haqda ommaviy axborot vositalari xabar bermoqda.
Al Jazeera ma’lumotlariga ko‘ra, Um-Baru hududida o‘tkazilgan tekshiruvlar natijasida 500 nafar boladan 53 foizida oziqlanish yetishmovchiligi aniqlangan. Ularning har oltinchisi og‘ir darajadagi ozib ketishdan aziyat chekmoqda.
Bu holat hayot uchun jiddiy xavf tug‘dirib, shoshilinch tibbiy yordam ko‘rsatilmasa, bir necha hafta ichida o‘limga olib kelishi mumkin. YUNISEF ijrochi direktori Ketrin Rassellning so‘zlariga ko‘ra, vaqt bu yerda hal qiluvchi ahamiyatga ega.
Yordam kechikkan har bir kun yangi qurbonlar sonining oshishiga olib kelmoqda. Hozirgi vaqtda Um-Baru hududida taxminan 100 ming nafar qochqin yashab kelmoqda.
2023 yilda boshlangan mojaro natijasida minglab insonlar halok bo‘ldi, 12 milliondan ortiq odam o‘z uyini tark etishga majbur bo‘ldi va mamlakatning ayrim hududlarida ocharchilik yuzaga keldi. BMT ma’lumotlariga ko‘ra, Sudan ayni paytda dunyodagi eng og‘ir gumanitar inqirozlardan birini boshdan kechirmoqda.
