Yangi yil bayrami arafasida Andijon shahrining Urikzor mahallasida joylashgan Mashrab ko‘chasi to‘liq rekonstruksiya qilinib, yangilangan holatda foydalanishga topshirildi. Bu haqda Zamin.uz xabar berdi.
Endilikda ushbu ko‘cha sutkaning 24 soati davomida gastronomik, sayyohlik va savdo-xizmat yo‘nalishida faoliyat ko‘rsatadi. Loyihani amalga oshirish uchun 12 milliard so‘m miqdorida investitsiya yo‘naltirildi.
Ko‘chaning har ikki tomonida savdo, xizmat ko‘rsatish va umumiy ovqatlanish bilan shug‘ullanuvchi 50 ta obyekt ish boshladi. Bu esa 120 ta doimiy ish o‘rni yaratishga imkon berdi.
Kechki va tungi vaqtlarda ko‘cha zamonaviy infratuzilma, yorqin yoritish tizimi va piyodalar uchun qulay muhit tufayli shaharning eng gavjum joylaridan biriga aylanyapti. Shuningdek, Yangi yil bayramlari kunlari bu yerda andijonliklar va tashrif buyurgan mehmonlar uchun konsert dasturlari tashkil etilishi rejalashtirilgan.
Yangilangan Mashrab ko‘chasining ochilishi shaharni rivojlantirish, kichik biznesni qo‘llab-quvvatlash va sayyohlik salohiyatini oshirishga qaratilgan ishlarning bir qismi hisoblanadi. Mazkur loyiha hudud infratuzilmasini yangilash va iqtisodiy faollikni kuchaytirishga xizmat qiladi.
