Yangi yilni birinchi bo‘lib Kiribati kutib oladi
Dunyoda Yangi yilni birinchi bo‘lib Kiribati davlati aholisi kutib oladi. Bu haqda Zamin.uz xabar berdi.
Bu davlat Tinch okeanidagi Layn orollarida joylashgan bo‘lib, sayyoradagi eng oldingi vaqt mintaqasi – UTC+14 ga kiradi. Shu sababli, Yangi yil Kiribatida Toshkent vaqti bilan taxminan soat 15:00 da boshlanadi.
Kiribatida bayram tadbirlari odatda okean sohillarida o‘tkaziladi. Mahalliy aholi plyajlarda to‘planib, mushakbozliklar va turli bayramona tadbirlar orqali yangi yilni nishonlaydi.
Sayyohlar ham bu hududga maxsus kelib, “yilning birinchi Yangi yili”ni kuzatish imkoniyatidan foydalanadi. Kiribatidan keyin Yangi yil Samoa va Tonga davlatlariga kirib keladi.
Bu mamlakatlar UTC+13 vaqt mintaqasida joylashgan bo‘lib, bayram an’anaviy qo‘shiqlar, raqslar va ommaviy tadbirlar bilan nishonlanadi. Eslatib o‘tish joizki, Samoa 2011 yilda vaqt mintaqasini o‘zgartirgach, dunyoda Yangi yilni birinchi kutib oluvchi davlatlar safiga qo‘shilgan.
Keyingi navbatda Yangi Zelandiya Yangi yilni qarshi oladi. Oklend va Vellington shaharlarida katta mushakbozliklar tashkil etilib, minglab odamlar bayram tadbirlarida ishtirok etadi.
Yangi Zelandiyaga qarashli Chatem orollari esa UTC+13:45 vaqt mintaqasida joylashgani sababli Yangi yilni birmuncha oldinroq nishonlaydi. Shuningdek, Fiji, Tuvalu, Nauru, Uollis va Futuna kabi Okeaniyada joylashgan davlatlar ham Yangi yilni dunyoda birinchi bo‘lib kutib oluvchi mamlakatlar qatoriga kiradi.
Bu hududlarda bayram tadbirlari dengiz sohillarida o‘tkazilib, milliy raqslar, an’anaviy taomlar va boshqa madaniy tadbirlar bilan bezatiladi. Shu tariqa, Yangi yilni birinchi kutib olish sharafi asosan Tinch okeani davlatlariga nasib etadi.
