Ramzan Qodirov salomatligi jiddiy xavf ostida
Checheniston rahbari Ramzan Qodirovning salomatligi bilan bog‘liq vaziyat jiddiylashmoqda. Bu haqda Zamin.uz xabar berdi.
“Novaya Gazeta Yevropa” nashrining xabar berishicha, Qodirov 24 dekabr kuni Rossiya prezidenti Vladimir Putin raisligida o‘tishi rejalashtirilgan Davlat kengashi yig‘ilishida qatnashish uchun Moskvaga yetib kelgan. Biroq 24 dekabrdan 25 dekabrga o‘tar kechasi uning sog‘lig‘i keskin yomonlashgan.
Manbalarning ta’kidlashicha, Qodirov shoshilinch tarzda Prezident administratsiyasiga qarashli Markaziy klinik shifoxonaga reanimobil orqali olib borilgan. Shifokorlar uning ahvolini barqarorlashtirishga muvaffaq bo‘lishgan, ammo undan keyin u uyiga qaytgan va jamoatchilik oldida deyarli ko‘rinmagan.
Davlat kengashi yig‘ilishida Checheniston vakilining qatnashishi uchun zaxira variant ko‘zda tutilmaganligi sababli bu tadbir respublika rahbarisiz o‘tkazilgan. Nashrning yana bir manbasi Qodirovning sog‘lig‘i borasida “ijobiy yakun bo‘lishiga deyarli umid qolmadi”, deb izoh bergan.
Avvalroq ham uning sog‘lig‘i yomonlashayotgani haqida xabarlar tarqalgan edi.
