Janubiy Afrikada 10 ming kishi fuqaroliksiz yashamoqda
Janubiy Afrikada tug‘ilgan bo‘lsa-da, ayrim odamlarda tug‘ilganlik guvohnomasi yo‘qligi sababli ular rasmiy xizmatlardan foydalana olmaydi. Bu haqda Zamin.uz xabar berdi.
25 yoshli Arnold Nkub shunday insonlardan biri. U janubiy afrikalik bo‘lish huquqiga ega bo‘lsa ham, hujjatsizligi sababli o‘qishni davom ettira olmagan va tirikchilik uchun avtomobillarni yuvish bilan shug‘ullanmoqda.
Fuqaroligi yo‘q bo‘lgan odamlar o‘zlarini go‘yo ko‘rinmas, mavjud bo‘lmagan shaxsdek his qilishadi. Ular bank hisob raqamini ocholmaydi, rasmiy ishga kira olmaydi va davlat xizmatlaridan foydalana olmaydi.
Janubiy Afrikada taxminan 10 ming kishi shu holatda yashamoqda, ammo aniq statistika yo‘q. Kristi Chitengu ham ilgari hujjatlarsiz yashagan.
U uch yil oldin advokatlar yordamida janubiy afrikalik fuqarolikka ega bo‘ldi. Uning fikricha, fuqarolik – bu mukofot emas, balki har bir insonning hurmat bilan yashash huquqidir.
Mutaxassislarning ta’kidlashicha, butun dunyoda millionlab odamlar fuqaroliksiz yashashga majbur. Bu muammoni hal qilish uchun qochqinlar va ularning farzandlarini tug‘ilgan joyida ro‘yxatga olish hamda onalarga o‘z fuqaroligini farzandlariga o‘tkazish huquqini kafolatlash lozim.
