Xabarovsk shahrida O‘zbekiston fuqarosining vafot etishi bilan bog‘liq vaziyat O‘zbekistonning Vladivostokdagi Bosh konsulxonasi va Migratsiya agentligi tomonidan nazoratga olingani ma’lum qilindi. Bu haqda Zamin.uz xabar berdi.
Tashqi ishlar vazirligi matbuot xizmatining xabar berishicha, Rossiyadagi diplomatik vakolatxona marhumning yaqinlari bilan doimiy aloqada bo‘lib, ularga zarur yordam ko‘rsatmoqda. Hozirda marhumning jasadini O‘zbekistonga qaytarish ishlari tashkil etilmoqda.
Tashqi ishlar vazirligi bayonotida hozircha o‘lim sabablariga doir rasmiy ma’lumotlar mavjud emasligi aytilgan. Vakolatli idoralardan tasdiqlangan ma’lumotlar kelib tushgach, jamoatchilikka qo‘shimcha axborot berilishi ta’kidlandi.
Shu bilan birga, Bosh konsulxona mazkur holatni tekshirish uchun Rossiya huquqni muhofaza qiluvchi organlari va Rossiya Tashqi ishlar vazirligiga tegishli so‘rovlar yuborgan. Avvalroq ijtimoiy tarmoqlarda OMON xodimlari tomonidan ikki nafar o‘zbekistonlik kaltaklangani va ulardan biri komaga tushgani haqidagi xabarlar tarqalgan edi.
Tashqi ishlar vazirligi ikkinchi fuqaro bilan bog‘liq ma’lumotning tasdiqlanmaganini ma’lum qildi.
