Eron namoyishlarida yetti kishi halok bo‘ldi
Eron bo‘ylab davom etayotgan norozilik namoyishlari chog‘ida yetti kishi halok bo‘ldi. Bu haqda Zamin.uz xabar berdi.
Ular orasida huquq-tartibot xodimlari va namoyish ishtirokchilari bor. Bu haqda xalqaro axborot agentliklari xabar bermoqda.
Namoyishlar 28-dekabr kuni Tehron shahrining asosiy bozor hududida boshlangan. Ushbu hodisaga valyuta kursining keskin pasayishi va narxlarning tezkor oshishi sabab bo‘lgan.
Do‘kon egalari va talabalar iqtisodiy holatdan norozi bo‘lib, ko‘chalarga chiqqan. Reuters agentligining hisob-kitoblariga ko‘ra, 2025-yil davomida Eron milliy valyutasi — riali dollarga nisbatan deyarli ikki barobar qadrsizlangan.
Dekabr oyida mamlakatda inflyatsiya darajasi 42,5 foizga yetgani kuzatilgan. Keyinroq Eronning boshqa hududlarida ham norozilik aksiyalari o‘tkazilgan.
Eng keskin to‘qnashuvlar Azna shahrida sodir bo‘lgani aytilmoqda. Rasmiylar norozilik ishtirokchilari bilan muloqot o‘tkazishga tayyor ekanliklarini bildirgan.
Ammo huquq-tartibot idoralari bu namoyishlarni chetdan uyushtirilgan fitna sifatida talqin qilgan. IRNA axborot agentligining ma’lumotlariga ko‘ra, mamlakatdagi faollar valyuta kursini barqarorlashtirish va pul-kredit siyosatini muvofiqlashtirish zarurligini ta’kidlamoqda.
Ayni paytda rasmiylar iqtisodiy muammolarni hal etish bo‘yicha chora-tadbirlar ishlab chiqmoqda.
