AQSh prezidenti Donald Tramp Eron hukumatining namoyishchilarga nisbatan zo‘ravonlikni kuchaytirishi va ularga qarshi ayovsiz choralar qo‘llashi mumkinligi haqida ogohlantirdi. Bu haqda Zamin.uz xabar berdi.
U agar bunday holatlar yuz bersa, Vashington namoyishchilarni qo‘llab-quvvatlashga tayyor ekanini ma’lum qildi. Tramp o‘zining Truth Social’dagi xabarida Qo‘shma Shtatlar zarur hollarda harakat qilishga tayyor ekanligini ta’kidladi.
Ushbu bayonot Eron hududida davom etayotgan norozilik namoyishlari va ular davomida qurbonlar borligi haqidagi xabarlar tarqalgan bir paytda e’lon qilindi. Erondagi noroziliklar o‘tgan yilning dekabr oyidan buyon davom etmoqda.
Bu holatlarga milliy valyutaning keskin qadrsizlanishi va inflyatsiyaning oshishi sabab bo‘lgani aytilmoqda. Keyinchalik mamlakatning turli hududlarida o‘z-o‘zidan uyushtirilgan norozilik chiqishlari kuzatilgan.
Eng jiddiy to‘qnashuvlar Azna shahrida qayd etilgan. Eron rasmiylari namoyishchilar bilan muloqot qilishga tayyor ekanliklarini bildirgan bo‘lsa-da, huquqni muhofaza qilish organlari bu voqealarni tashqi kuchlar tomonidan uyushtirilgan fitna sifatida baholamoqda.
