Tabiiy resurslarga tayanadigan davlatlar ro‘yxati e’lon qilindi
Neft, gaz, ko‘mir va boshqa turdagi foydali qazilmalar ko‘plab mamlakatlar uchun asosiy daromad manbai bo‘lib qolmoqda. Bu haqda Zamin.uz xabar berdi.
Ammo bunday iqtisodiyotlar jahon bozoridagi xomashyo narxlarining o‘zgarishiga juda sezgir bo‘ladi. Bu holat davlat byudjeti tushumlari, ish o‘rinlari va valyuta kirimlari ko‘p jihatdan ushbu omillarga bog‘liq ekanini anglatadi.
So‘nggi ma’lumotlarga ko‘ra, tabiiy resurslarga eng ko‘p tayanadigan davlat sifatida Liviya qayd etiladi. Bu mamlakatda yalpi ichki mahsulotning 61 foizi aynan resurslar hisobidan shakllanadi.
Shuningdek, Iroq, Kongo Demokratik Respublikasi va Kongo kabi davlatlarda ham YAIMning 33 foizdan ortig‘i tabiiy resurslar ulushiga to‘g‘ri keladi. Tabiiy resurslarning katta qismi Yaqin Sharq va Afrika mintaqalarida joylashgan.
Neft va gaz zaxiralari bilan mashhur bo‘lgan davlatlar qatoriga Eron, Angola, Ummon, Qatar va Saudiya Arabistoni kiradi. Shuningdek, Zambiya, Mongoliya, Ekvatorial Gvineya va Chad kabi mamlakatlar ham foydali qazilmalar zaxirasi hamda neft eksporti bilan ajralib turadi.
Taqqoslash uchun, O‘zbekiston iqtisodiyotida eng katta ulush xizmatlar sohasiga to‘g‘ri keladi. Savdo, transport, aloqa, turizm va boshqa yo‘nalishlar mamlakat YAIMining taxminan 45–50 foizini tashkil etadi.
Bu esa O‘zbekiston iqtisodiyotining ancha diversifikatsiyalashganligini ko‘rsatadi.
