2026 yil 1 yanvardan boshlab Mustaqil Davlatlar Hamdo‘stligida (MDH) raislik Tojikistondan Turkmanistonga o‘tdi. Bu haqda Zamin.uz xabar berdi.
Endilikda yil davomida Turkmaniston poytaxti Ashxobod MDH doirasidagi faoliyatni muvofiqlashtirib, ishtirokchi davlatlar o‘rtasidagi hamkorlikning asosiy yo‘nalishlarini belgilaydi. Bu haqda ommaviy axborot vositalari xabar bermoqda.
Turkmaniston prezidenti Serdar Berdimuhamedov raislik davrida MDH salohiyatini to‘liq ro‘yobga chiqarish, ko‘p tomonlama hamkorlikni rivojlantirish va yangi sur’at berish niyatini bildirgan edi. 2026 yilda Turkmaniston siyosiy muloqotni rivojlantirish, iqtisodiy hamkorlikni kengaytirish, gumanitar aloqalarni mustahkamlash hamda mintaqaviy xavfsizlik va barqarorlikni ta’minlashga alohida e’tibor qaratadi.
MDH doirasida kelishilgan tashabbuslarni amalga oshirish, jumladan, terrorizmga qarshi kurash dasturlari, chegara xavfsizligini mustahkamlash va energiya ta’minotini barqaror qilish bo‘yicha hamkorlik ustuvor yo‘nalishlardan biri bo‘ladi. Yil davomida MDH davlat rahbarlari sammiti o‘tkazilishi rejalashtirilgan bo‘lib, bu tadbir Milliy turizm zonasi Avazoda tashkil etilishi kutilmoqda.
Bundan tashqari, Turkmaniston “MDH Plyus” platformasi doirasida hamdo‘stlikdan tashqaridagi davlatlar bilan hamkorlikni kengaytirishni davom ettiradi. Ushbu raislik Ashxobodga mintaqaviy maydondagi diplomatik mavqeini mustahkamlashda yangi imkoniyatlar yaratadi.
Neytral davlat sifatida Turkmaniston postsovet hududida vositachi va barqarorlikni ta’minlovchi omil sifatida o‘z rolini yanada mustahkamlashi mumkin. Umuman olganda, Turkmanistonning MDHga raisligi hamdo‘stlikni rivojlantirish mas’uliyatini oshirish bilan birga, mintaqaviy kun tartibini shakllantirishda ham muhim ahamiyat kasb etmoqda.
