Rossiya 2026 yilda ODKBga raislikni boshlaydi
2026 yilning 1 yanvaridan boshlab Rossiya Kollektiv xavfsizlik shartnomasi tashkiloti (ODKB)ga raislik qilishni boshladi. Bu haqda Zamin.uz xabar berdi.
Shu munosabat bilan Rossiya tashqi ishlar vaziri Sergey Lavrov tashkilot raisligidagi asosiy ustuvor yo‘nalishlarni e’lon qildi. Lavrovning ta’kidlashicha, Rossiya raislikni “Ko‘p qutbli dunyoda kollektiv xavfsizlik: yagona maqsad, umumiy mas’uliyat” shiori ostida olib boradi.
U ODKB doirasida a’zo davlatlar xalqaro xavfsizlik bo‘yicha umumiy yondashuvlarni himoya qilish uchun birgalikda ishlashga intilishini ma’lum qildi. Lavrov tashkilot faoliyatining asosiy tamoyillari sifatida tinch-totuv yashash, mojarolarni siyosiy-diplomatik yo‘l bilan hal qilish va BMTning xalqaro huquq me’yorlariga asoslangan hal qiluvchi rolini ta’kidladi.
Rossiya Yevroosiyo mintaqasida xavfsizlik arxitekturasini shakllantirishda hamkor davlatlar bilan birgalikda ishlashni rejalashtirgan. ODKB esa bu tizimning muhim tayanchlaridan biri sifatida ko‘rilmoqda.
Shuningdek, Lavrov ODKB uchinchi davlatlarga qarshi yo‘naltirilmagan va tajovuzkor xarakterda emasligini ta’kidladi. Uning aytishicha, tashkilotdagi barcha qarorlar konsensus asosida qabul qilinadi va ular o‘zaro hurmat, manfaatlar muvozanati hamda qo‘shnichilik tamoyillariga asoslanadi.
Rossiya avvalgi Qirg‘iziston raisligi davrida ishlab chiqilgan tashabbuslarni davom ettirgan holda, hamkorlikning asosiy yo‘nalishlarini rivojlantirishni maqsad qilgan. Geosiyosiy keskinliklar sharoitida Rossiya ODKB davlatlari o‘rtasidagi ittifoqchilik rishtalarini mustahkamlash va mintaqadagi barqarorlikni saqlashga intiladi.
U tashkilotning asosiy vazifasi sifatida a’zo davlatlarning xavfsiz rivojlanishi va farovonligini ta’minlashni belgiladi. Shu bilan birga, ODKBning kuch ishlatish salohiyatini oshirish, zamonaviy qurollanish va jangovar imkoniyatlarni kuchaytirish ham rejalashtirilgan.
Rossiya biologik tahdidlarga qarshi himoya, axborot xavfsizligi, mudofaa-sanoat majmualarini rivojlantirish va innovatsion salohiyatni ishga solish bo‘yicha hamkorlikni kuchaytirishni rejalashtirgan. Shuningdek, xalqaro terrorizm, ekstremizm, noqonuniy migratsiya va qurol savdosiga qarshi kurashish masalalariga ham alohida e’tibor qaratiladi.
Lavrov ODKBga a’zo davlatlar parlamentlari o‘rtasidagi hamkorlikni kuchaytirish zarurligini ta’kidladi. 2026 yilda ODKB Parlament Assambleyasining 20 yilligi nishonlanadi.
Lavrovning fikricha, bu assambleya tashkilotning huquqiy bazasini shakllantirishda muhim rol o‘ynaydi. U raislik davrida ODKB davlatlari bilan yaqin va samarali hamkorlik qilishga tayyor ekanini bildirdi.
Shu orqali tashkilot faoliyati sifat jihatidan yangi bosqichga ko‘tarilishi mumkinligini ta’kidladi.
