Venesuelada portlashlar: Maduro favqulodda holat e’lon qildi

Bugun tongda Venesuela poytaxti Karakas shahrida va boshqa hududlarda bir nechta portlashlar sodir bo‘ldi. Bu haqda Zamin.uz xabar berdi.

Mamlakat hukumati bu voqealarni AQSh tomonidan amalga oshirilgan "harbiy agressiya" deb baholadi. Venesuela Prezidenti Nikolas Maduro milliy favqulodda holat e’lon qilib, mudofaa kuchlarini safarbar etishga chaqirdi.

Portlashlar Miranada, Aragua va La Guira shtatlarida ham qayd etilgan. Guvohlar va ijtimoiy tarmoqlarda tarqalgan videotasvirlarda portlashlar natijasida yuzaga kelgan qora tutun va samolyotlar ko‘rinishi haqida ma’lumot berilgan.

Poytaxtning janubiy qismida joylashgan yirik harbiy baza yaqinida elektr energiyasining uzilishi kuzatilgan. Venesuela hukumati bergan bayonotga ko‘ra, AQSh ushbu hujumlar orqali mamlakatning neft va boshqa tabiiy resurslarini egallashni rejalashtirgan.

Biroq, hukumat bunday urinishlar muvaffaqiyatsiz bo‘lishini ta’kidladi. Shu bilan birga, AQSh Prezidenti Donald Tramp avvalroq Venesuelada harbiy harakatlar ehtimoli haqida bayonot bergan edi.

Pentagon mazkur masala bo‘yicha izoh berishdan bosh tortib, savollarni Oq uyga yo‘naltirgan. Hozircha Oq uy bu borada rasmiy izoh bermagan.